Read Batak Simalungun PODAH 8 Bible Online

PODAH 8 - Batak Simalungun bible

PODAH 8

¹Ai lang dilo-dilo do hapentaran ai, anjaha hauhuron ai pamaling sorani? [92]

²I atas, bani buntu-buntu, i lambung ni dalan, bani sirpang do ia jongjong,

³bani horbangan, bani dalan masuk hubagas huta, bani horbangan hudarat do ipamaling sorani, nini,

⁴“Bennima do, ale dalahi, dilo-dilo ahu, anjaha taur-taur bennima, ale anak ni jolma.

⁵Guruhon hanima ma habotohon, ale halak na bodoh, anjaha hanima, gabe halak na maruhur ma.

⁶Tangihon ma, ai sihol mansahapkon na maharga do ahu, sihol manluarhon hasintongan do bibirhu;

⁷ai hasintongan do sihol hatahonon ni pamanganku; tapi magigi do bibir hubani na masambor.

⁸Pintor do haganup sahap ni pamanganku; seng dong na geduk atap na lepak ijai.

⁹Haganupan ai sintong do bani siparuhur, anjaha bonar bani halak na marpambotoh.

¹⁰Jalo ma pangajaranku, rahanan humbani pirak, sonai homa habotohon, dearan humbani omas pitah. [93]

¹¹Harganan do hapentaran ase mutiha, anjaha haganup na hinarosuhkon ni halak seng taratasisi ai. [94]

¹²Ahu, hapentaran ai, marianan do i lambung ni hapandeian, jumpahan habotohon pakon hapandeian do ahu.

¹³Biar bani Jahowa, magigi do ai bani na masambor, uhur hagijangon ampa pangenjengon, parlahou na masambor ampa parsahap na margoling-goling, magigi do ahu pasal ai. [95]

¹⁴Ahu do simada panuturion pakon na pasaudkon ai, Ahu do simada hauhuron pakon hagogohon.

¹⁵Marhitei ahu do manggomgomi raja-raja, anjaha itotapkon siparkuasa hapintoron. [96]

¹⁶Marhitei ahu do manrajai sipanggomgomi, sonai homa na sangap-sangap ampa haganup panguhum na pintor.

¹⁷Holong do uhur hubani sagala na mangkaholongi ahu, anjaha halak sipindahi ahu, sai jumpahsi do ahu. [97]

¹⁸Bangku do habayakon pakon hamuliaon, arta na manotap pakon hapintoron. [98]

¹⁹Dearan do buahku humbani omas, humbani omas pitah tene, sonai age pansarianku humbani pirak pilihan. [99]

²⁰Bani dalan hapintoron do ahu mardalan, bani dalan habonaran do langkahku,

²¹laho manlayak-layakkon parbagianan bani na mangkaholongi ahu, laho manggoki parartaan ni sidea.

²²Jahowa do manompa ahu bani mungkah ni panompaon-Ni, gabe parmulaan ni horja-Ni bani na basaia. [100]

²³Bani panorang sapari ai do ahu iadongkon, bani mulani, paima adong tanoh on.

²⁴Seng dong ope laut domma itubuhkon ahu, seng dong ope bah tubuh na marburlak-burlakkon bah, [101]

²⁵sanggah lape ipasuk sagala dolog, anjaha sanggah lape adong buntu-buntu, domma itubuhkon ahu;

²⁶sanggah lape iadongkon tanoh on tene, ampa ladangni, sonai age orbuk na parlobei i tanoh on. [102]

²⁷Sanggah Ia pajongjongkon langit ai, ijai do ahu, sanggah na binolat-Ni ai hajangkajang i atas ni laut ai, [103]

²⁸sanggah ninahkon-Ni ai hombun i atas, sanggah pinaroh-Ni ai bah na marburlak-burlak hun toruh,

²⁹sanggah na binahen-Ni ai parbolatan ni laut, ase ulang ilanggar bah ai parentah-Ni, sanggah na pinasuk-Ni ai onjolan ni tanoh on, [104]

³⁰ijai do ahu, anak hinaholongan-Ni, i lambung-Ni ijia, megah ni uhur-Ni ahu ganup ari, marguro-guro tongtong i lobei-Ni,

³¹marguro-guro do ahu i sab dunia on, anjaha malas do uhur hubani jolma manisia. [105]

³²Ai pe, ale anakku, tangihon ma ahu, martuah do halak siramotkon dalanku. [106]

³³Tangihon hanima ma pangajaranku, ase pentar hanima, sai ulang ma lansei pasal ai.

³⁴Martuah ma halak sitangihon ahu, na marjaga ganup ari bani labahku, anjaha sipanramotkon bani horbanganku.

³⁵Halak na jumpahan ahu, hagoluhan do jumpahsi anjaha gabe harosuh bani Jahowa. [107]

³⁶Tapi na so jumpahan ahu, dirini do pinarsedani, sagala na magigi bangku, hamatean do hinaholonganni ijai.”