Read Batak Simalungun PARAMBILAN 1 Bible Online

PARAMBILAN 1 - Batak Simalungun bible

PARAMBILAN 1

¹Hata ni Parambilan ai, anak ni si Daud, raja i Jerusalem.

²Sisoya-soya do tongon, nini Parambilan ai, sisoya-soya do haganup.

³Aha ma gunani bani jolma haganup halojaonni, na hinangalutkonni i toruh ni langit? [1]

⁴Salpu sada sundut, roh sundut na legan, tapi tanoh on lalab do totap. [2]

⁵Poltak do mata ni ari, dob ai sundut use, anjaha mangolos mulak bani ianan hapoltakonni.

⁶Mangombus do logou ai dompak dangsina, dob ai mulak dompak utara; marputor-putor do laho logou ai, anjaha mulak use bani habingkatonni.

⁷Haganup binanga ai mabaor dompak laut, tapi laut ai lanjar do lang ra gok. Bani ianan habaoranni, hujai do binanga ai mangulaki mabaor.

⁸Haganup do gok halojaon, seng tarpatugah jolma haganupan ai; seng marnasombuh mata mangidah, anjaha seng marnabosur pinggol manangar. [3]

⁹Aha na dob ongga masa, ai do masa use, anjaha aha na dob ongga ibahen halak, ai do ibahen use, seng dong na baru i toruh ni langit. [4]

¹⁰Ai adong, atap aha pe ai, na boi hatahonon ni halak pasal ai, “Tonggor ma, na baru do on?” Domma adong hinan ai sapari, bani panorang na i lobeita.

¹¹Seng dong be na mardingat bani sisapari ai, sonai homa pasal na sihol masa ope, seng dong be na mardingat pasal ai bani na i pudi ni ai.

¹²Ahu, Parambilan ai, ongga do raja bani Israel i Jerusalem. [5]

¹³Iporluhon uhurhu do marhasoman hapentaran, mamareksa ampa manulimati sagala na tarjadi i toruh ni langit. Horja hangaluton do ai, na tinotapkon ni Naibata bani jolma manisia, ase marhangaluton marhitei ai. [6]

¹⁴Domma huidah sagala horja, na hinorjahon i toruh ni langit; tonggor ma, haganupan ai sisoya-soya do, anjaha songon na manangkap logou do.

¹⁵Na geduk seng tarpapintor, anjaha na so ijin seng tarbilangi. [7]

¹⁶Ningku ma ibagas uhurhu, “Domma hupabuei anjaha hutambahi namin bangku hapentaran lobih humbani sagala sipanrajai na i Jerusalem, anjaha buei do hapentaran pakon habotohon i idah uhurhu. [8]

¹⁷Anjaha iporluhon uhurhu do mangarusi hapentaran ampa habotohon, mangarusi haotoon ampa halontongon.” Dapot uhurhu ma, on pe na manangkap logou do hansa. [9]

¹⁸Ai lambin buei hapentaran lambin buei do sitaronon, anjaha barang ise na patambah habotohon, patambah hasunsahanni do.