Read Batak Simalungun PARAMBILAN 10 Bible Online

PARAMBILAN 10 - Batak Simalungun bible

PARAMBILAN 10

¹Lanog na matei mambahen marbau minak na misbou ni sipauli morum-moruman sonai do haotoon na otik parseda hapentaran pakon hasangapon.

²Uhur ni halak na pentar laho dompak siamun, tapi uhur ni halak na oto laho dompak sambilou do.

³Bani dalan ja pe mardalan halak na oto, taridah do hurang ni uhurni, tapi nini do bani halak haganup, sidea do na oto.

⁴Anggo nahit ringis ni si panggomgomi bam, ulang ma tadingkon iananmu, ai uhur na lamlam do padaohkon buei dousa. [79]

⁵Adong do na masambor huidah masa i hasiangan on, ai ma halepakon na binahen ni halak si panrajai.

⁶Halak na oto ipahundul bani ianan na sangap, tapi halak na bayak hundul bani ianan na toruh. [80]

⁷Huidah jabolon mangajak huda, hape raja-raja mardalan nahei songon jabolon.

⁸Ise na mangkurak godung, ia sandiri do madabuh hubagas; ise na parseda tembok batu, paguton ni ulog do. [81]

⁹Ise na mangungkit batu, ra do ugahan, anjaha ise na mambolah hayu, ra do marmara.

¹⁰Anggo majol hapak anjaha seng iasah matani, maningon marbois gogoh do halak managilhon ai; tapi untung do ai anggo hapentaran mangkasomani gogoh.

¹¹Anggo domma ipagut ulog paima itabasi, seng marguna be habotohon ni si panabas. [82]

¹²Hata humbani pamangan ni halak na pentar mambahen ia gabe harosuh, tapi parsahap ni halak na oto parseda dirini do. [83]

¹³Mungkah ni sahap ni pamanganni haotoon do, anjaha ujung ni parsahapanni pe podou do.

¹⁴Buei do sahap-sahap ni halak na oto, age pe seng ibotoh jolma in atap aha na sihol masa; ai ise ma na boi patugahkon bani atap aha na sihol masa i pudini? [84]

¹⁵Hangaluton do horja bani halak na oto, dalan hu tiga pe seng ibotoh. [85]

¹⁶Bursik ma ho, ale tanoh, anggo dakdanak panrajai bam, anjaha halak na sangap-sangap i tongah-tongahmu girah sogod pe domma marpesta-pesta.

¹⁷Martuah ma ho, ale tanoh, anggo halak na marjumbalang panrajai bam, anjaha na sangap-sangapmu mambotoh marpesta bani panorangni, songon halak na hormat, seng songon halak parminum-minum.

¹⁸Halani harayohon masik do parhayu ni rumah, anjaha halani tangan na galek tiris rumah. [86]

¹⁹Laho marmegah-megah iadongkon halak do pesta-pesta anggur do sipamalas goluh on, anjaha duit do na marsahap bani haganup. [87]

²⁰Age ibagas uhur ulang ma burai raja, anjaha ibagas kamar podomanmu pe, ulang ma burai halak na bayak, ai padason ni manuk-manuk na i awang-awang do soramai, anjaha patugahon ni siparhabong sahapmai. [88]