Read Batak Simalungun PARAMBILAN 11 Bible Online

PARAMBILAN 11 - Batak Simalungun bible

PARAMBILAN 11

¹Padalan ma rutimu hu dipar ni laut, ai bani dokah-dokah ni ari, sai na jumpah ho do ai. [89]

²Bahen ma ai marbagi pitu atap ualuh, ai seng ibotoh ho atap hasedaon aha do na sihol masa hu atas tanoh on. [90]

³Anggo gok udan ma hombun, iduruskon ma ai hu atas tanoh on; anggo marumbak hayu, dompak dangsina atap dompak utara, bani ianan harumbakanni ai ma ai tibal.

⁴Halak na sai mardiateihon logou, seng saud martidah be ai, anjaha halak na patorih-torih hombun, seng saud be manabi.

⁵Songon na so boi botohonmu sonaha pardalanan ni logou, anjaha sonaha parjadi ni holiholi ibagas boltok ni parinangon na boratan rumah, sonai do homa seng ibotoh ho pambahenan ni Naibata na manjadihon haganup. [91]

⁶Girah sogod ma saburhon bonihmu, anjaha bodari pe ulang mintor marsaran tanganmu, ai seng ibotoh ho atap na ija na dua ai manjadi, atap rap do haduasi ai manjadi.

⁷Matobu do na lihar ai, anjaha marosuh do mata mangidah mata ni ari.

⁸Tongon, anggo manggoluh jolma in marpuluh-puluh tahun, marmalas ni uhur ma ibagas haganupan ai; tapi idingat ma homa pasal ari na golap, buei do ai. Haganup na sihol masa, sisoya-soya do ai.

⁹Marmalas ni uhur ma, ale garama, sanggah panorang haposoonmu, anjaha megah ma uhurmu bani panorang haparanaonmu. Anjaha bahen ma domu hubani na sininta ni uhurmu, ampa domu hubani harosuh ni matamu, tapi botoh da, bani haganupan ai boanon ni Naibata do ho hu paruhuman. [92]

¹⁰Padaoh ma uhur na sunsah humbagas uhurmu, anjaha paholang ma na masambor humbani angkulamu; ai panorang hadakdanakon ampa haposoon, laho salpu do ai.