Read Batak Simalungun PARAMBILAN 12 Bible Online

PARAMBILAN 12 - Batak Simalungun bible

PARAMBILAN 12

¹Ingat ma Sitompa ho bani ari haposoonmu, paima lape roh ari na masambor, anjaha lape das panorangni, hatahononmu holi ijai, “Seng marosuh be ahu pasal in!”

²Paima lape golap mata ni ari ampa na lihar, bulan ampa bintang-bintang, anjaha mulak manorap hombun dob salpu udan.

³Ai bani panorang ai holi hitir-hitir ma si jaga rumah, anjaha gundung dalahi-dalahi na margogoh, maronti si panduda manduda, ai otik mando sidea tading, anjaha gombur ma si pangkawah humbani jandela;

⁴tartutup ma homa na dua labah na dompak alaman ai, anjaha lambin nangetni sora ni losung; masihil ma sora songon sora ni manuk-manuk, anjaha surut ma homa sipandoding;

⁵mabiar do bani dalan tangkog, anjaha gobir i tongah dalan; marurus ma homa bunga na lopak ai humbani untei hasumba, anjaha borat manlangkah balang, sir ni uhur pe miloh ma. Ai laho ma jolma in marayak rumahni sisadokah ni dokahni, anjaha halak si panangisi pe domma marodor i alaman.

⁶Paima rotap tali pirak ai anjaha matapor batil omas ai; paima lape mabolah gusi i lambung ni bah tubuh anjaha marosak tahu-tahu na i sumur;

⁷paima mulak orbuk ai hu tanoh, pambuatanni hinan, anjaha tonduy ai mulak hubani Naibata, na mamberehon ai hinan. [93]

⁸Sisoya-soya do tongon, nini Parambilan ai, sisoya-soya do haganup. [94]

⁹Ambah ni na pentar Parambilan ai, iajarhon do homa habotohon hubani halak na mabuei; itimbang anjaha ipareksa anjaha ibahen do buei podah. [95]

¹⁰Ipindahi Parambilan ai do hata na sangkan, anjaha sintong do isuratkon hata hasintongan ai.

¹¹Hata ni halak na pentar songon lonsing-lonsing do, anjaha songon paku na ipakuhon do podah na ipatumpu ai; marhitei sada parmahan do iberehon ai. [96]

¹²Ambah ni ai, ale anakku, sai ra ma ho paingaton! Seng ra maronti na mambahen buku-buku, anjaha halojaon ni angkula do buei marlajar.

¹³Pangibulan ni haganup na dob binogei ai, “Habiari ma Naibata, anjaha dalankon ma titah-Ni, ai do hawajiban ni ganup jolma. [97]

¹⁴Ai boanon ni Naibata do sagala pambahenan hu paruhuman, haganup na ponop, na dear atap na sambor pe ai.” [98]