Read Batak Simalungun PARAMBILAN 2 Bible Online

PARAMBILAN 2 - Batak Simalungun bible

PARAMBILAN 2

¹Jadi ningku ma ibagas uhurhu, “Nai ma, husuba ma lobei marhitei na marmalas-malas ni uhur, anjaha hudai ma haganup na mantin-mantin;“ tapi tonggor ma, sisoya-soya do homa ai.

²Hubani partatawaan ai huhatahon, “Haotoon do in!” anjaha hubani malas ni uhur ai, “Ai aha do gunani in?”

³Tubuh do uhurhu ibagas, sihol pahisar angkulangku marhitei anggur, tapi uhurhu do sipambobai bangku ibagas hapentaran; sihol homa mandalankon haotoon, ase boi hubotoh, atap aha do na madear sihorjahonon ni anak ni jolma in i toruh ni langit, sadokah goluhni na pondok in. [10]

⁴Jadi huhorjahon ma pambahenan na banggal-banggal. Hupauli ma rumah bangku, anjaha hupungkah pohon anggur.

⁵Hubahen ma bangku pohon ampa taman bunga halilian, husuani do ijai bagei hayu na marbuah.

⁶Hubahen homa bangku bongbongan, laho mangarbahi marhitei ai hayu suanan na tabun martumbori ijai.

⁷Huboli do jabolon dalahi pakon jabolon naboru, adong do homa bangku jabolon na dob tubuh i rumahku. Age hulanan ni lombu pakon biribiri dong do bangku, bueinan humbani haganup na i Jerusalem.

⁸Hupajunjun do homa bangku pirak, omas pakon arta na maharga humbani raja-raja ampa nagori-nagori. Hubuat homa bangku pandoding, dalahi pakon naboru, ampa sipamalas uhur ni jolma manisia, ai ma naboru-naboru buei. [11]

⁹Jadi timbul ma ahu, anjaha bayakan marimbang haganup jolma na i lobeihu i Jerusalem; anjaha totap do homa hapentaran ai rapkon ahu.

¹⁰Haganup pinarsinta ni matangku seng hulanglangi; anjaha seng hutahan uhurhu humbani malas ni uhur aha pe, ai maningon malas do uhurhu ibagas halani haganup halojaonku, ai do rupeihu ibagas haganup halojaonku.

¹¹Tapi dob hukawahkon haganup pambahenanku, sagala na binahen ni tanganku, ampa hangaluton, na hudagei ibagas na mangkorjahon ai, tonggor ma, sisoya-soya do haganup, anjaha songon na manangkap logou tumang, seng dong na marguna i toruh ni langit. [12]

¹²Dob ai marhusor ma ahu, laho manimbang pasal hapentaran, haotoon pakon halontongan. Ai aha do bahenon ni halak sipanggantih raja in? Ai ma na dob ongga binahen ni halak hinan. [13]

¹³Jadi huidah ma, surungan do hapentaran marimbang haotoon songon surung ni haliharon marimbang hagolapan.

¹⁴Halak na pentar marhaliharon do mata na bani uluni, tapi mardalan bani na golap do anggo halak na oto. Tapi huidah ma, sisada sitaronon do haduasi ai. [14]

¹⁵Jadi ningku ma ibagas uhurhu, “Anggo songon pangandungan ni halak na oto do homa pangandunganku, mase ma sai huparleilei hapentaran na sain dokah?” Jadi ningku ma ibagas uhurhu, “Ai pe sisoya-soya do.”

¹⁶Ai seng lalab pardingat ni halak bani halak na pentar age bani halak na oto; bani panorang na laho roh, haganupan ai ihalupahon do. In le, matei do hape halak na pentar usih songon halak na oto! [15]

¹⁷Jadi sobalan ma ahu bani goluh on, ai hagigi do bangku haganup na masa i toruh ni langit, ai sisoya-soya do haganup, anjaha songon, na manangkap logou do.

¹⁸Magigi do ahu mangidah sagala halojaon na huhalojahon i toruh ni langit, halani maningon tadingkononku do ai bani jolma na roh hun pudingku. [16]

¹⁹Anjaha ise pabotoh-botoh ai atap halak na pentar ia atap halak na oto? Hape ia ma siparkuasa bani sagala horja na dob huhalojahon ibagas hapentaran i toruh ni langit! Age ai pe sisoya-soya do.

²⁰Jadi das ma uhurhu hubani na sihol mandolei, mangidah sagala horja, na dob huhalojahon i toruh ni langit.

²¹Ai halak, na dob loja marhasoman hapentaran, habotohon ampa hapandeian mandalankon horjani, hape maningon do ai bahen rupei ni jolma na so pala loja. Sisoya-soya do on anjaha hamagouan banggal.

²²Ai aha do ulih bani jolma humbani haganup horjani ampa humbani sinta-sinta ni uhurni, na hinalojahonni i toruh ni langit? [17]

²³Ai sadokah ia manggoluh marsitaronon do, anjaha gok hasunsahan do horjani, anjaha borngin pe seng marhasonangan uhurni. Sisoya-soya do age ai. [18]

²⁴Seng dong sidearan bani jolma humbani na mangan ampa na minum, anjaha ipasonang uhurni marhitei na madear ibagas halojaonni. Ai pe, mangihutkon na huahap, sibere-bere ni Naibata do ai. [19]

²⁵Ai ise ma boi mangan, anjaha ise ma marmegah-megah, anggo seng marhiteihon-Si.

²⁶Ai bani jolma hinarosuhkon ni uhur-Ni do ilayak-layakkon Naibata hapentaran, habotohon pakon malas ni uhur. Tapi halak pardousa ipaturut do loja laho patumpuhon pakon pajunjunkon, ase ibere Naibata use ai bani halak hinarosuhkon ni uhurni. Ai pe sisoya-soya do, anjaha songon na manangkap logou tumang do. [20]