Read Batak Simalungun PARAMBILAN 4 Bible Online

PARAMBILAN 4 - Batak Simalungun bible

PARAMBILAN 4

¹Dob ai huulaki ma mangidah sagala odoh-odoh na masa i toruh ni langit. Anjaha tonggor ma, iluh ni halak na niodoh-odoh, hape seng dong na mangapohi sidea. Hona paksa do sidea ibahen sipangodoh-odoh, tapi seng dong sipangapoh bani sidea.

²Jadi martuahan do halak na dob dokah matei ai nini uhurhu, marimbang halak na manggoluh ope; [29]

³tapi martuahan ope marimbang haduasi ai, halak na so tubuh, ai ma na so mangidah pambahenan na jahat, na masa i toruh ni langit. [30]

⁴Dob ai huidah ma sagala hangaluton pakon horja hapandeian, hape patubuh uhur na marsisimburuan do ai. Ai pe sisoya-soya do, anjaha na manangkap logou tumang do.

⁵Halak na oto lompit-lompit tangan hansa, gabe dagingni sandiri ipangan. [31]

⁶Dearan do sanggolom marhasoman sonang ni uhur humbani dua nangging, tapi gok hangaluton anjaha manangkap logou tumang. [32]

⁷Dob ai huidah ma use na soya i toruh ni langit: [33]

⁸Adong ma sada halak na tarpunjung, na so marniombah, na so marsanina, hape ipukpuk do marhorja, anjaha matani seng marnasombuh mangidah habayakon, dobni sungkun-sungkun bani dirini, “Ai ise do na huhopkop ase lang marsonang-sonang ahu?” On pe sisoya-soya do, anjaha hangaluton na masambor. [34]

⁹Dearan do dua halak humbani na sandirian, ai dapotan upah na madear do sidea bani halojaonni.

¹⁰Ai anggo targompang sidea, boi do sidea marsiurupan; tapi seda do halak na sandirian, ai anggo targompang ia, seng dong na manogusi.

¹¹Sonai homa, anggo rap modom dua halak, jadi marsipamalasan ma sidea; tapi anggo sahalak, sonaha ma boi malas ia?

¹²Age pe tartalihon sahalak sada halak na sandirian, tapi dua halak martahan do i lobeini, anjaha tali na tinolu seng urah rotap.

¹³Dearan do sada parana na miskin, tapi na maruhur, humbani sada raja na matua, tapi na botoh anjaha na so ra palumbaon.

¹⁴Ai luar do parana hun tutupon laho bangkit raja, age pe masombuh hinan ia itubuhkon, sanggah raja ope halak na legan. [35]

¹⁵Huidah do haganup halak na manggoluh na i toruh ni langit, hampit parana ai do, ai ma na manggantihsi ai.

¹⁶Seng tarbilangi buei ni halak na binobahonni, tapi halak na roh i pudini seng marosuh be bani. On pe sisoya-soya do anjaha manangkap logou tumang. [36]

¹⁷Jaga ma panlangkahmu laho masuk hu rumah ni Naibata; roh hun dohor laho manangihon, dearan do ai humbani galangan na ginalangkon ni halak na oto, halani seng ibotoh, na sambor do hape hinorjahonni ai. [37]