Read Batak Simalungun PARAMBILAN 5 Bible Online

PARAMBILAN 5 - Batak Simalungun bible

PARAMBILAN 5

¹Ulang Maherteptu Pamanganmu, anjaha Ulang Mapodastu Uhurmu Manluarhon Hata i Lobei ni Naibata, ai Naibata i nagori atas do; tapi anggo ho i tanoh on do; halani ai paotik ma parsahapmu. [38]

²Ai roh do nipi humbani buei ni panarian, anjaha sahap haotoon humbani buei ni sahap-sahap. [39]

³Anggo marbagah-bagah ho bani Naibata, ulang ma padokah-dokah pasaudkon ai, ai seng marosuh Ia mangidah halak na oto. Aha na dob binagahkonmu, pasaud ma ai. [40]

⁴Dearan do ulang ho marbagah-bagah humbani na marbagah-bagah, hape seng ipasaud.

⁵Ulang lopas pamanganmu mambahen badanmu mardousa, anjaha ulang ma hatahon i lobei ni suruhan ni Naibata, “Na silap do in!” Mase ma pala manringis Naibata halani sahapmu, anjaha iparseda horja ni tanganmu? [41]

⁶Ai anggo buei nipi, buei do na so mararti, buei do sahap-sahap; tapi anggo ho, habiari ma Naibata.

⁷Anggo ididah ho pandorunon bani halak na masombuh, hasedaon ni uhum sonai hapintoron i nagori in, ulang pala longang uhurmu pasal ai, ai adong do na mardiateihon siparkuasa-siparkuasa ai, anjaha Na Tang Sitimbulan in do mangatasi sidea haganup.

⁸Ibagas haganupan ai, adong do untung bani sada nagori, anggo iuhurhon raja parjuma-jumaon.

⁹Halak na marsinta-sintahon pirak, seng anjai bosur ia humbani pirak; anjaha barang ise na gok uhurni bani habayakon, seng sombuh homa halani pansarianni. On pe sisoya-soya do. [42]

¹⁰Tambah pansarian, tambah do na mangankon; aha ma laba bani simada ai, sobali na mangidah-idah ai?

¹¹Sinok do modom halak siparhorja, atap otik pe ipangan atap buei, tapi seng tarpodom halak na bayak ibahen habayakonni.

¹²Adong do hamagouan banggal, na huidah i toruh ni langit, ai ma habayakon na pinagugun gabe hasedaon bani simadasi.

¹³Ai magou do habayakon ai, halani na masa; seng dong na tading ibagas tangan ni anak na tinubuhkonni.

¹⁴Songon na talanjang ai ia mandarat hun boltok ni inangni, sonai do parmulakni use; seng dong tarbuatsi age aha bahen upah ni halojaonni, na gabe siboanon ni tanganni hujai. [43]

¹⁵Anjaha on pe hamagouan banggal do: Sonin parrohni, sonai do parmisirni; aha ma ulihni, ai lang na manangkap logou do ia na ngalutan ai?

¹⁶Sadokah goluhni golapan anjaha pusok do uhurni; buei do hasunsahanni, boritan anjaha panringisan.

¹⁷Tonggor ma, pasal na madear na huidah ai: Patut do mangan anjaha minum jolma in, anjaha ipasonang uhurni bani na madear ibagas hangalutonni, na hinorjahonni i toruh ni langit, sadokah ni goluhni na pondok in, na binere ni Naibata bani; ai do rupeini. [44]

¹⁸Tongon, anggo ibere Naibata bani jolma habayakon pakon arta, ipaturut homa ia mangan ampa marbagian hunjai, anjaha marmalas ni uhur bani horjani, ai pe sibere-bere ni Naibata do.

¹⁹Ai seng sadiha be ipingkiri ari-ari ni goluhni na pondok in, halani malas ni uhur na binere ni Naibata hubagas uhurni.