Read Batak Simalungun PARAMBILAN 6 Bible Online

PARAMBILAN 6 - Batak Simalungun bible

PARAMBILAN 6

¹Adong do hasamboron huidah i toruh ni langit, anjaha na paboratkon do ai bani jolma.

²Sada halak, ibere Naibata habayakon pakon arta ampa hasangapon bani, anjaha lang hurangan ia pasal atap aha pe sinta-sintani, tapi lang ilopas Naibata ia mangan hunjai, halak na legan do na mamboiskon ai. Sisoya-soya do on, anjaha naborit na mabajan. [45]

³Porini adong saratus niombah ni sada halak, ganjang umurni pala sayur matua, tapi seng sonang uhurni ibagas hadoharonni ai, gari tanomanni pe seng dong, huhatahon ma pasalsi, “Dearan do na matei tarposo ase ia.”

⁴Sisoya-soya do ia roh anjaha ibagas na golap misir, lanjar hagolapan manrungkub goranni;

⁵mata ni ari pe seng sompat ididah anjaha lang itandai; tapi sonangan do ia humbani halak ondi.

⁶Porini manggoluh pe ia dua ribu tahun dokahni, hape na madear seng ongga ididah, ai lang sada ianan do hadasan ni haganup?

⁷Haganup hangaluton ni jolma mansarihon pamanganni do, tapi lanjar do seng bosur tonduyni.

⁸Ai aha do hasurungan ni halak na pentar humbani halak na bodoh? Aha do gunani bani halak na madoyuk, na mambotoh marparlahou i tongah-tongah ni halak na manggoluh?

⁹Dearan do na nididah ni mata, humbani na manguhurhon na so ijin. On pe sisoya-soya anjaha na manangkap logou tumang do.

¹⁰Atap aha pe na masa, domma dokah hinan igoran pasal ai, anjaha pasal jolma in pe domma binotoh hinan; seng mangasup ia martinggil pakon Sigogohan in. [46]

¹¹Lambin tambah hata-hata, lambin tambah na soya; aha ma gunani ai bani jolma? [47]

¹²Ise ma na mambotoh aha na madear bani jolma in ibagas goluhni, na pondok anjaha sisoya-soya in, na laho salpu songon halinoh? Ise tene na boi patugahkon bani jolma in, atap aha na sihol masa i pudini i toruh ni langit? [48]