Read Batak Simalungun PARAMBILAN 7 Bible Online

PARAMBILAN 7 - Batak Simalungun bible

PARAMBILAN 7

¹Rahanan do barita na madear ase minak na morum, anjaha dearan ari parmatei humbani ari partubuh. [49]

²Rahanan do laho hu rumah na marpusok ni uhur ase hu rumah na marpesta-pesta; ai ijai taridah ujung ni sagala jolma manisia, anjaha halak na manggoluh patut ma parimbagaskononni ai.

³Rahanan do na marpusok ni uhur ase na tartawa, ai horu ni uhur do na padearhon paruhuran. [50]

⁴Uhur ni halak na pentar sai i rumah partangisan do, tapi uhur ni halak na oto i rumah parpestaan do.

⁵Rahanan do manangihon pinsang-pinsang ni halak na pentar, humbani na manangar doding ni halak na oto. [51]

⁶Tongon, songon parhuratak ni soban duri-duri i toruh ni hudon, sonai do partawa ni halak na oto. On pe sisoya-soya do.

⁷Tongon, odoh-odoh do mambahen oto halak na pentar, anjaha sisip parseda paruhuran.

⁸Dearan do na manginteihon hadobanni humbani parmulaanni, dearan do paruhur na sabar humbani si gijang uhur. [52]

⁹Ulang maurahtu uhurmu manggila, ai ringis ibagas uhur ni halak na oto do ai marianan. [53]

¹⁰Ulang hatahon, “Mase ma dearan ari sapari humbani sisonari?” Ai seng sungkun-sungkun na pentar na sonai ai.

¹¹Dear do hapentaran marhasoman arta tean-teanan; surungan do ai bani halak na mangidah mata ni ari.

¹²Ai tarbahen do marlinggom bani hapentaran age bani pirak; tapi hasurungan ni habotohon: Hapentaran ai do mambere goluh bani halak simadasi. [54]

¹³Papangkei ma horja ni Naibata; ise ma tarbahen papintorhon na dob pinageduk-Ni? [55]

¹⁴Bani ari na madear marmalas ni uhur ma ho; anjaha bani ari na masambor paruhurhon ma: Naibata do manjadihon na sada ampa na legan ai, ase ulang ibotoh jolma atap aha na sihol masa.

¹⁵Haganupan on domma huidah ibagas goluhku sisoya-soya on: Adong do halak parpintor magou ibagas hapintoronni, anjaha adong homa halak parjahat sayur matua ibagas hajahatonni. [56]

¹⁶Ulang ma mapintortu ho, anjaha ulang ma mapentartu; mase ma parsedaonmu dirimu?

¹⁷Ulang ma majahattu ho, anjaha ulang ma gabe halak na oto ho; mase ma rahanan matei lape jumpah panorangni? [57]

¹⁸Dear do, anggo ijolom ho na sada on, anjaha ulang homa maluah tanganmu humbani na sada ai; ai barang ise na mabiar mangidah Naibata, bansah do ia humbani haganupan ai.

¹⁹Hapentaran ai do margogohi halak na pentar, lobih humbani sapuluh halak puanglima, na adong ibagas huta.

²⁰Tongon, seng dong halak parpintor i tanoh on, sihorjahon na madear tumang, anjaha na so ongga mardousa. [58]

²¹Homa, sagala hata na hinatahon ni halak, ulang ma parimbagaskon ai; ulang ma tangi ho bani juakjuakmu na mamurai ho.

²²Ai lang ibotoh ho do homa ibagas uhurmu, na gati do ho mamurai halak na legan?

²³Haganupan on domma huuji marhitei hapentaran, ningku, “Sihol pentar do ahu!” Hape lambin daoh do hapentaran ai humbangku.

²⁴Daoh do sagala na adong ai anjaha bagas tumang; ise ma na boi jumpahan ai? [59]

²⁵Dob ai hupagoling ma uhurhu, sihol mananda, mamareksa pakon mangidah hapentaran pakon panimbangion, anjaha sihol mananda, ia hajahaton ai ma haotoon, anjaha haotoon ai ma podou. [60]

²⁶Jadi jumpah ahu ma: Janginan do humbani hamatean naboru, na dob songon puhot ia, uhurni songon jarot, anjaha tanganni songon tali panangkut; halak harosuh ni Naibata maluah do hun bani, tapi sipardousa hona tangkap do ibahen. [61]

²⁷Tonggor ma, on do na jumpah ahu, nini Parambilan ai, sada-sada huuji, laho mambuat panrimpunanni;

²⁸na dob marulak-ulak hupareksa, tapi seng jumpah ahu: Jumpah ahu do sada dalahi humbani saribu halak, tapi anggo naboru, seng jumpah ahu i tongah-tongah ni ganupan ai.

²⁹Tonggor ma, on tumang do na jumpah ahu, ai ma, bujur do jolma in itompa Naibata, tapi buei do ranggi-ranggian ni uhurni. [62]