Read Batak Simalungun PARAMBILAN 8 Bible Online

PARAMBILAN 8 - Batak Simalungun bible

PARAMBILAN 8

¹Ise do doskon halak na pentar in? Anjaha ise do na mambotoh hatorangan pasal haganup? Hapentaran ni sada jolma do mambahen lihar bohini, anjaha koras ni bohini mubah do. [63]

²Ahu mangkatahon, dalankon ma parentah ni raja, ampa hata na dob binulawankonmu bani Naibata. [64]

³Ulang ma maurahtu ho padaohkon diri hun bani, anjaha ulang ma magolgoltu ho bani parkara na so madear, ai aha rosuh ni uhurni, ai do ibahen.

⁴Ia parentah ni raja gok kuasa do; ise ma na pag mangkatahon dompaksi, “Aha do na binahenmu in?”

⁵Ise na mandalankon parentah, seng dageionni na masambor, ai ibotoh halak na pentar do pasal panorangni pakon uhumanni.

⁶Ai bani haganup adong do panorang ampa uhumanni, anjaha hasamboron ni jolma, ai do sibobanon bani. [65]

⁷Tongon, seng dong na mambotoh atap aha na sihol masa, ai ise ma na boi patugahkon na sihol masa ai bani? [66]

⁸Seng dong jolma na markuasa bani logou na boi mangolat ai; seng dong homa na markuasa bani ari parmateini, anjaha na boi maluah humbani porang; seng tarbahen hajahaton paluahkon na mangkorjahonsi. [67]

⁹Haganupan ai domma huidah anjaha huparuhurhon haganup pambahenan na masa i toruh ni langit, bani panorang ni jolma manrajai hasomanni jolma gabe hasedaon bani sandiri.

¹⁰Ambah ni ai, huidah do tartanom halak parjahat; tapi halak na mangkorjahon na madear, luar humbani ianan na pansing in, anjaha lupa halak bani ibagas huta. Ai pe sisoya-soya do.

¹¹Halani ai lang mintor podas mardalan uhum bani pambahenan hajahaton, halani ai gok do uhur ni jolma manisia laho mandalankon hajahaton. [68]

¹²Age pe ihorjahon si pardousa na masambor saratus hali, anjaha sayur matua homa ia, tapi tangkas do hubotoh, sai na martuah do halak si habiari Naibata, halani marhabiaran sidea i lobei-Ni; [69]

¹³tapi seng anjai dear anggo halak parjahat, anjaha seng tarpaganjangsi umurni, songon halinoh do ia, halani seng marhabiaran ia i lobei ni Naibata.

¹⁴Sisoya-soya do ai, na masa ai i atas tanoh on: Adong do halak parpintor, mangonai do bani sidea, songon na bani pambahenan ni halak parpintor. Ningku ma, “On pe sisoya-soya do.” [70]

¹⁵Halani ai hupuji do malas ni uhur ai; ai seng dong na madear bani jolma i toruh ni langit, sobali na mangan minum pakon marmalas ni uhur. Ai boi do ia mangkasomanisi ibagas halojaonni sadokah ari-ari ni goluhni, na binere ni Naibata bani, i hasiangan on. [71]

¹⁶Sanggah na hupabulat uhurhu, laho manandai hapentaran ampa laho marimbagaskon sagala na masa i atas tanoh on, ai ma, na so tarpodom ai halak arian pakon borngin,

¹⁷jadi huidah ma sagala pambahenan ni Naibata, tongon, seng tarbahen jolma mambotoh pambahenan ai, na masa i hasiangan on. Age sonaha pe loja ni jolma, ase ibotoh ai, seng anjai jumpahsi ai. Age pe nini halak na pentar, domma ibotoh, seng tongon ibotoh ai. [72]