Read Batak Simalungun PARAMBILAN 9 Bible Online

PARAMBILAN 9 - Batak Simalungun bible

PARAMBILAN 9

¹Tongon, haganupan on domma huparuhurhon, anjaha domma hupareksa haganup: Ia halak parpintor age halak na pentar ampa pambahenan ni sidea ibagas tangan ni Naibata do; holong ni uhur pe atap domdom, seng iarti jolma in. Haganup na i lobei ni sidea sisoya-soya do:

²ai sisada sitaronon do haganup, halak parpintor ampa halak parjahat, halak sidear uhur ampa halak na masambor, halak na pansing ampa halak na mabutak, halak sipanggalang ampa na so sipanggalang; songon na masa bani halak na daulat, sonai do bani halak pardousa, songon na bani halak si parbija, sonai do bani halak na mabiar marbija. [73]*

³On do hasamboron ibagas haganup na masa i hasiangan on, ai ma na sisada sitaronon ai haganup; anjaha halani homa gok hajahaton do uhur ni jolma manisia, anjaha haotoon do ibagas uhur ni sidea sadokah manggoluh sidea, dob ai parayakonni do halak na dob matei ai. [74]*

⁴Tongon, ise na marianan ope i tongah-tongah ni halak na manggoluh, na adong ope pangarapanni, ai baliang na manggoluh, rahanan do ai humbani singa na matei.

⁵Ai halak na manggoluh ibotoh do na laho matei sidea, tapi halak na dob matei, aha pe lang be ibotoh; seng dong be upah bani sidea, anjaha seng dong be na mardingat sidea.

⁶Age holong ni uhur ni sidea, domdomni ampa simburuni pe masab do; anjaha lalab ma seng marbagian be sidea bani haganupan na masa i hasiangan on.

⁷Ase laho ma, pangan ma rutimu ibagas malas ni uhur, anjaha inum ma anggurmu ibagas sonang ni uhur, ai domma iharosuhkon Naibata pambahenanmu sisonai ai. [75]*

⁸Sai tongtong ma ho marpakeian silopak, anjaha ulang ma lang marminak ulumu.

⁹Sai marmalas ni uhur ma ho rap pakon parinangonmu, na hinaholongan ni uhurmu sadokah ari-ari ni goluhmu na pondok in, na binere ni Naibata bam i hasiangan on, ai do rupeimu bani goluh on ampa bani horja, na hinalojahonmu i hasiangan on. [76]*

¹⁰Atap aha na jumpah tanganmu bahen sihorjaonkon, dalankon ma ai humbani gogohmu, ai seng dong be horja atap panimbangion atap habotohon atap hapentaran anggo i nagori toruh, siparayakonmai.

¹¹Ambahni ai huidah do i hasiangan on: Seng bani halak na lingkat hape hamonangan maradu, seng puanglima monang bani parporangan, seng halak na pentar na marnah ruti, seng halak na maruhur gabe bayak, anjaha seng halak na pandei gabe harosuh; tapi haganupan sidea tunduk do bani panorang ampa na masa. [77]*

¹²Ai seng ibotoh jolma in panorangni: Songon dengke na hona tangkap ibahen jala, anjaha songon manuk-manuk na dapot ibahen siding sonai do jolma manisia hona tangkap sanggah panorang hamagouan, sanggah sogop ai sompong bani sidea.

¹³Hapentaran sisonon pe huidah do i hasiangan on, anjaha banggal do bangku ai:

¹⁴Adong ma sada huta na etek, anjaha otik do pangisini; roh ma sada raja na banggal mamorang ai, ihubu ma huta ai, anjaha ipauli parugas pangkubu inggot.

¹⁵Jadi adong ma sada halak na masombuh, tapi na pentar ibagas huta ai, anjaha tarpaluahsi do namin huta ai marhitei hapentaranni, hape seng dong na mardingat na masombuh ai.

¹⁶Jadi ningku ma, “Dearan do hapentaran ase hagogohon, tapi mapas do uhur ni halak mangidah hapentaran ni halak na masombuh ai, anjaha seng itangihon hata sipaingatni.” [78]*

¹⁷Hata ni halak na pentar, na iluarhon dear-dear, rahanan do manangihon ai humbani surak-surak ni sada raja i tongah-tongah ni halak na oto.

¹⁸Rahanan do hapentaran ase parugas porang, tapi sada pe parjahat bahat do na pinarsedani.