Read Batak Simalungun DODING NI DODING 1 Bible Online

DODING NI DODING 1 - Batak Simalungun bible

DODING NI DODING 1

¹Doding ni Doding humbani Raja Salomo.

²Sai isummah ma ahu marhitei summah ni pamanganni! Ai mantinan do holongmu ase anggur. [1]

³Morum do minakmu, goranmu songon minak na misbou na niuseihon; halani ai do ase rosuh anak boru mangidah ham.

⁴Togu ham ma ahu, papodas hita ma! Iboan raja ai ma ahu hu kamarni. Marolob-olob do hanami anjaha marmalas ni uhur mangidah ham, ipuji hanami do holong ni uhurmu lobih humbani anggur, patut do holong uhur ni sidea bamu.

⁵Birong do ahu namin, tapi jenges do, ale boru Jerusalem, songon tenda ni halak Kedar, songon tirei ni si Salomo. [2]

⁶Ulang ma mapas pangkawahnima bangku, halani na birong ai rupangku, ai mata ni ari do na manlulus ahu. Manggila do anak ni inang bangku, isuruh sidea do ahu manjaga pohon anggur; tapi pohon anggurhu sandiri, seng hujaga. [3]

⁷Pabotohkon ma bangku, ham haholongan ni uhurhu, ija do ham marmahan, ija ipasaran ham hulananmu tongah arian? Ai mase ma songon halak na mampar-ampar ahu i lambung ni hulanan ni hasomanmu?

⁸Anggo seng ibotoh ham ai, ham ale si jengesan i tongah-tongah ni anak boru, irikkon ham ma bokas ni biribiri ai, anjaha parmahan ma hambingmu i lambung ni tenda ni parmahan. [4]

⁹Usih do ham, ale hinasiholan ni uhurhu, bani huda na manarik gareta ni Parao.

¹⁰Jenges do huyummu marnah ugas-ugas, anjaha borgokmu marsinongkok mutiha. [5]

¹¹Sinongkok omas paulionnami ope bamu, marsimatah bani pirak.

¹²Sanggah hundul raja ai mangan, muap do misbou ni minakku. [6]

¹³Haholongan ni uhurhu sasangkutan mir do ai bangku, tibal bani tontonku.

¹⁴Haholongan ni uhurhu satandan bunga henna do ai bangku, na dob tubuh i pohon anggur En-Gedi.

¹⁵Tongon, jenges do rupamu, ale hinasiholanku, jenges tumang do ham, songon asas do matamu. [7]

¹⁶Tongon jenges do ham, ale haholonganku, jenges tumang do ham. Marbunga-bunga simaratah do podomanta.

¹⁷Hayu ares do tiang ni rumahta, anjaha dingdingni ilampis bani hayu maranti.