Read Batak Simalungun DODING NI DODING 2 Bible Online

DODING NI DODING 2 - Batak Simalungun bible

DODING NI DODING 2

¹Ia ahu bunga na i Saron do, silundat na i habungan.

²Songon silundat i tongah-tongah ni duri-duri, sonai do tongon hinasiholan ni uhurhu i tongah-tongah ni anak boru.

³Songon hayu untei manis i tongah-tongah ni hayu harangan, sonai do tongon haholonganku i tongah-tongah ni garama. Marosuh do uhurhu hundul bani linggomni, anjaha mantin do buahni bani tolonanku.

⁴Iboan do ahu hubagas rumah anggur ai, anjaha tandani bangku ai ma holong. [8]

⁵Ipargogohi do ahu marhitei kuei buah anggur, ipahisar marhitei untei manis; tongon, boritan do ahu halani sihol ni uhurhu. [9]

⁶Tangan sambilouni mangkalang ulungku, tangan siamunni manrohop ahu. [10]

⁷Hupabija ma nasiam, ale boru Jerusalem, bani ursa ampa bani balua boru-boru na i talun. Ulang ma iganggu atap ipuhoi nasiam na marsihaholongan paima sombuh uhurni. [11]

⁸Tangar, sora ni haholonganku! Tonggor ma roh do ia, marlintun-lintun bani dolog-dolog, manlumpat-lumpat bani buntu-buntu. [12]

⁹Usih do haholonganku bani balua atap ursa na maposo. Tonggor ma, jongjong do ia i lopah ni tembok ni rumahnami, mangkawah humbani jandela, manorih-norih humbani jaring-jaring. [13]

¹⁰Marsahap ma haholonganku, nini hu bangku, “Jongjong ma ham, ale hinasiholanku, eta ma, ale botou na majenges!

¹¹Tonggor ma, domma salpu musim borgoh, lopus anjaha salpu musim udan.

¹²Martumbori ma bunga-bunga i ladang, domma jumpah panorang mandoding-doding, anjaha sora ni anduhur ginti tarbogei do bani tanohta.

¹³Hayu ara pe marmabeian ma buahni, hayu anggur marbungai anjaha misbou uapni. Jongjong ma ham, ale hinasiholanku, eta ma, ale botou na majenges!”

¹⁴Ale asasku, na marianan bani rigat ni dolog batu, bani parponopan na i salahsah, pataridahkon ham ma rupamu bangku, pabogeihon ma soramu, ai dear do soramu, jenges do rupamu. [14]

¹⁵Tangkapi galot in, galot na etek-etek in, na mansedai pohon anggur, ai domma marbungai pohon anggurta. [15]

¹⁶Haholongan ni uhurhu, ahu do simadasi, anjaha ia simada ahu, ia do na marmahan i tongah-tongah ni bunga silundat. [16]

¹⁷Paima marombus logou sogod-sogod, anjaha lintun na golap, roh ma ham, ale haholonganku, usih bani balua ma ham atap bani ursa na maposo i atas ni dolog rium-riuman.” [17]