Read Batak Simalungun DODING NI DODING 3 Bible Online

DODING NI DODING 3 - Batak Simalungun bible

DODING NI DODING 3

¹Bani podomanku, borngin-borngin, hupindahi do haholongan ni uhurhu. Hupindahi do ia, tapi seng jumpah ahu. [18]

²Puho ma ahu, husiar ma huta in inggot, dalan-dalan ampa alaman, pindah-pindah ahu bani haholongan ni uhurhu. Hupindahi do ia, tapi seng jumpah ahu.

³Jumpah si panrunda do ahu, sidea na manrunda i huta ai, “Haholongan ni uhurhu, adong tarpaidah nasiam?” [19]

⁴Ai pe lopus ahu humbani sidea, jumpah ahu ma haholongankai, hutangkap ma ia, seng be hupaluah, paima hutaruhkon ia hu rumah ni inangku, masuk hu kamar ni na mantubuhkon ahu. [20]

⁵Hupabija ma nasiam, ale boru Jerusalem, hubani balua ampa hubani ursa boru-boru na i talun: Ulang ma iganggu atap ipuhoi na marsihaholongan paima sombuh uhurni. [21]

⁶Aha do in, na tangkog hun halimisan, na songon tiang timus, na iparium marhitei mir ampa dahupa; ai ma bagei ni rium-riuman ni sipartiga-tiga. [22]

⁷Tonggor ma, ai ma pangusungan bani si Salomo. Onom puluh halak do na manlioti ia, humbani puanglima-puanglima ni Israel,

⁸haganup sidea marpodang anjaha na somal marporang; ganup do sidea mangkalhal bani binongeini, manlawan na manginggoti borngin-borngin.

⁹Ipadear Raja Salomo do pangusungan bani ai ma humbani hayu Libanon.

¹⁰Ibahen do naheini humbani pirak, pangunsandeanni humbani omas, hundulanni humbani hiou hasumba anjaha humbagas ilampis bani hayu sibirong.

¹¹Luar ma nasiam, ale boru Sion! Tonggor ma Raja Salomo, marsortali, na sinortalihon ni inangni bani, sanggah panorang parunjukonni, bani ari malas ni uhurni.