Read Batak Simalungun DODING NI DODING 4 Bible Online

DODING NI DODING 4 - Batak Simalungun bible

DODING NI DODING 4

¹Tonggor ma, jenges do ham, ale hinasiholanku, jenges tumang do ham; songon mata ni asas do matamu i pudi ni tudung-tudungmu, jambulanmu usih bani hulanan ni hambing tuad hun dolog Gilead. [23]

²Iponmu usih bani biribiri na baru ginunting, na naik humbani paridianni, haganup sidea marrindu-rindu, seng dong na lambang humbani sidea. [24]

³Songon bonang na tinubar do bibirmu, lamlam ia parsahapmu, songon dalima na binolah do huyummu ipudi ni tudung-tudungmu. [25]

⁴Borgokmu songon manara ni si Daud, na pinauli bahen ianan ni sinjata; marribu do gantar margantungan ijai, ganupan ai gantar ni puanglima. [26]

⁵Adopmu haduasi songon anak silinduat ni balua, na manggagat i tongah-tongah ni silundat. [27]

⁶Paima marombus logou sogod-sogod anjaha lintun na golap, sihol do ahu laho hu dolog mir ampa hu buntu-buntu hamonan. [28]

⁷Gok do jengesmu, ale hinasiholan ni uhurhu, seng dong tikasmu age sada. [29]

⁸Rap pakon ahu hun Libanon, ale tunanganku, susur ma ham rap pakon ahu hun Libanon. Tuad ma ham hun pakpak ni Dolog Amana, hun pakpak ni Dolog Senir pakon Hermon, humbani parponopan ni singa, humbani dolog ianan ni begu!

⁹Domma tunduk uhurhu ibahen ham botou, tunanganku, domma ibuat ham uhurhu marhitei pangkirdop ni matamu tumang, marhitei sinongkok na bani borgokmu in.

¹⁰Jengesni in holongmu in, ale botou, tunanganku! Mantinan do holongmu, lobih humbani anggur, anjaha moruman do uap ni minakmu ase haganup minak na misbou.

¹¹Manisan do mangkatektek humbani bibirmu, ale tunanganku, manisan pakon susu do i toruh ni dilahmu, anjaha uap ni pakeianmu, songon uap ni Libanon do. [30]

¹²Songon pohon na hinondor do ham, ale botou, tunanganku, songon pansur na nirungga, anjaha songon bah tubuh na nilak. [31]

¹³Martumbor do ham, songon pohon na majenges gok hayu dalima marbuah na maharga tumang, marbunga-bunga henna ampa nardus,

¹⁴nardus ampa huning, hamonan pakon kulit manis, marbagei hayu na morum, mir ampa aloe, ronsi haganup hayu rompah.

¹⁵Songon bah tubuh i pohon do ham, bah tubuh hagoluhan, na mabaor hun Libanon. [32]

¹⁶Puho ma, ale logou utara, roh ma, ale logou dangsina! Mangombus ma bani pohonku, ase muap uapni na misbou ai! Roh ma haholonganku marayak pohonni, anjaha ipangan ma buahni na mantin in. [33]