Read Batak Simalungun DODING NI DODING 5 Bible Online

DODING NI DODING 5 - Batak Simalungun bible

DODING NI DODING 5

¹Roh ma ahu hu pohonku, ale botou, tunanganku! Hubuat do mirhu ampa minakku na misbou, hupangan asar ni lobahku ampa manisanni, anjaha huinum do anggurhu ampa susu: Mangan minum ma, ale huan-kuanku, marsombuh-sombuh ma ibagas holong! [34]

²Modom do ahu, tapi puho do uhurhu. Tangar ma, hartuk-hartuk do haholonganku, “Buka bangku botou, hinasiholan, ham asasku ampa na majenges! Marnamur-namur do ulungku, marbah jambulanku ibahen udan borngin. [35]

³Domma hutanggali bajungku, sonaha ma pakeianku use ijai? Domma huburihi naheihu, hubutaki ma use ai?” [36]

⁴Idurdurhon haholongan ni uhurhu do tanganni hun jaring-jaring, gabe muyun ma uhurhu ibagas.

⁵Jongjong ma ahu mangungkab bani haholonganku. Mangkatektek ma mir humbani tanganku, manjalir mir humbani jari-jaringku, sanggah na manjolom pating-pating ai.

⁶Hubuha ma bani haholonganku, hape misir do haholonganku, seng taridah be. Marosak do uhurhu na laho ai ia. Hupindahi ma ia, hape seng jumpah, hudiloi tapi seng marbalos. [37]

⁷Jumpah siparrunda do ahu, sidea na mardalan maringgot i huta ai; ibogbog do ahu pala ugahan, ibuat salendangku, sidea siparjaga i tembok ai.

⁸Hupabija ma nasiam, ale boru Jerusalem, anggo jumpah nasiam haholongan ni uhurhu, aha ma hatahonon nasiam hu bani? Boritan do ahu halani sihol ni uhurhu! [38]

⁹Ai aha ma surung ni haholongan ni uhurmu humbani haholongan na legan, ham ale si jengesan i tongah-tongah ni naboru? Ai aha ma surung ni haholonganmu humbani haholongan na legan, ase pala ipabija ham hanami?

¹⁰Lopak anjaha magerger do haholongan ni uhurhu, marhalobihan i tongah-tongah ni halak na marlaksa-laksa. [39]

¹¹Uluni songon omas pitah, jambulanni songon bulung ni halambir, mabirong songon kawak.

¹²Matani songon asas na i topi ni bah mardalan, na maridi ibagas susu, marianan bani bah mabuei. [40]

¹³Huyumni songon panampangan ni rompah-rompah, na mantubuhkon suan-suanan na misbou; bibirni songon bunga silundat, na manektekkon mir. [41]

¹⁴Tanganni songon omas na pinahibul, na tinatah bani mata intan tarsis; angkulani songon na pinauli humbani gading, ilampis bani mata intan sapir.

¹⁵Hae-haeni hira tiang batu marmar, jonam bani nahei omas; rupani songon Libanon, tarpilih songon hayu ares.

¹⁶Parsahapni matobu do, siharosuhkonon tumang do ia. Sonai ma haholongan ni uhurhu, sonai ma huankai, ale boru Jerusalem.