Read Batak Simalungun DODING NI DODING 6 Bible Online

DODING NI DODING 6 - Batak Simalungun bible

DODING NI DODING 6

¹Huja do laho haholongan ni uhurmu, ale sijengesan i tongah-tongah ni naboru? Dompak ja laho haholongan ni uhurmu, ase dihut hanami mangindahisi rap pakon ham?

²Domma tuad haudungan ni uhurhu hu pohonni, hu panampangan ni rompah-rompah, laho marmahan ibagas pohon ai, anjaha laho mambuat bunga silundat. [42]

³Haholongan ni uhurhu, ahu do simadasi, anjaha ia simada ahu, na marmahan i tongah-tongah ni silundat. [43]

⁴Jenges do ham songon Tirsah, ale hinasiholan ni uhurhu, dear songon Jerusalem, anjaha marjumbalang songon bala. [44]

⁵Padaoh ma matamu humbangku, ai sunsah do ahu ibahen. Jambulanmu usih bani hulanan ni hambing, tuad hun Dolog Gilead. [45]

⁶Iponmu usih hubani biribiri na baru ginunting, na naik hun paridianni; haganup sidea marrindu-rindu, seng dong na lambang humbani sidea. [46]

⁷Songon dahupa na binolah do huyummu i pudi ni tudung-tudungmu. [47]

⁸Onom puluh do nasipuang, ualuh puluh na binuat na legan, anak boru lang habilangan.

⁹Tapi sahalak do asasku, na majenges bangku, boru sasada ni inangni, kasihan ni na mantubuhkonsi. Kawah do anak boru hu bani, iparhatuah do ia, nasipuang ampa na binuat na legan mamuji-mujisi. [48]

¹⁰Ai ise do ai, na mangkawah songon simarikkuning, jenges songon bulan, lihar songon mata ni ari, anjaha jombut songon bala?

¹¹Tuad do ahu hu pohon hayu pala, laho manorih bunga-bunga na i habungan, laho manonggor atap martunasi ma hayu anggur, atap marbungai ma dalima.

¹²Seng panagaman ni uhurhu, ipaosor ma ahu hubagas gareta odoran ni raja. [49]

¹³Marhusor, marhusor ma, ale Sulamit, marhusor, marhusor ma, ase ididah hanami bohimu. Ai aha do kinawahkon nasiam bani si Sulamit, sanggah na manortor ia i parsaranan? [50]