Read Batak Simalungun JESAYA 1 Bible Online

JESAYA 1 - Batak Simalungun bible

JESAYA 1

¹Panonggoran ni si Jesaya, anak ni si Amos, na nididahni pasal tanoh Juda pakon huta Jerusalem bani panorang ni si Usia, si Jotam, si Ahas pakon si Hiskia, raja-raja ni Juda.

²Tangar ma ale langit, bogei ma ale tanoh; ai marsahap do Jahowa, “Hupagodang-godang do anak anjaha Hupatimbul, hape iimbang sidea do Ahu. [1]

³ Itanda lombu do simadasi, anjaha ibotoh halode do palangka binahen ni tuanni; tapi anggo Israel seng itandai Ahu, anjaha bangsang-Ku seng maruhur.

⁴Bursik ma bangsa si pardousa, bangsa sibuei hajahaton, ginompar ni halak na jungkat, anak si horjahon na masambor! Itadingkon sidea do Jahowa anjaha iapasi Na Pansing ni Israel, itundali sidea do Ia. [2]

⁵Bahen aha in sai nunuton lonsingon hanima, ai lambin surut do hanima humbangku? Ganup ulu boritan do, ganup pusu-pusu pe domma galek. [3]

⁶Humbani jampal ni nahei das bani ulu seng dong ijai na jorgit; na butong pakon na marbulistang, ampa ugah na mardaroh-daroh; seng hona pisat, seng hona balutan barang hona minakan. [4]

⁷Halong do tanohnima, matutung bani apuy hutanima, gogoh ni jumanima ipangan halak na legan i lobeinima; maseda do ai songon Sodom na matornoh. [5]

⁸Tarpunjung do boru Sion songon sopo-sopo i pohon anggur, songon lampolampo i pohon ansimun, songon huta na hinubu.

⁹Ambit lang itadingkon Jahowa Zebaot banta otik na maluah doskon Sodom pakon Gomora do hita. [6]

¹⁰Tangihon hanima ma hata ni Jahowa ale pambobai ni Sodom! Bogei ma titah ni Naibatanta, ale bangsa Gomora! [7]

¹¹“Benahangku ma galangan sisayatonnima na buei in,” nini Jahowa. “Domma sobalan Ahu bani galangan situtungonnima na humbani biribiri tunggal, ampa bani taboh-taboh ni lombu na pinamombur. Seng iharosuhkon uhur-Hu daroh ni lombu jonggi, atap biribiri atap hambing tunggal pe. [8]

¹²Anggo roh hanima Bangku sihol mangidah bohing-Ku, ise marsuruh hanima mandogei alaman-Ku?

¹³Ulang be boban hanima galangan na so marnidok; dahupa hagigi do ai Bangku. Poltak ni bulan, ari Sabat, na mangadongkon partumpuan-tumpuan Seng tarharosuhkon Ahu hajahaton ampa na marpesta-pesta.

¹⁴Poltak ni bulannima ampa pesta-pestanima ihagigihon Tonduy-Hu do; gabe boban do ai Bangku, anjaha loja do Ahu pausung-usung ai.

¹⁵Age pe ipaherbang hanima tangannima, lingodkonon-Ku do matang-Ku humbennima; age pe ipagati hanima martonggo, seng tangaron-Ku ai; ai gok daroh do tangannima. [9]

¹⁶Maridi ma hanima, manguras ma hanima! Padaoh hanima ma hajahatonnima hun lobei ni matang-Ku; parontihon hanima mangkorjahon na masambor! [10]

¹⁷Parlajari mambahen na madear, pindahi habonaron, urupi halak na hona tokoh, ondingi halak na tading maetek, apiti naboru na mabalu! [11]

¹⁸Roh ma hanima, ase marturiak hita, nini Jahowa. Age pe gerger dousanima songon bunga ni dapdap lopak do bahenon-Ku ai songon salju, age pe gerger songon hiou hasumba, putih do bahenon-Ku ai songon kapas. [12]

¹⁹Anggo ra hanima anjaha pambalosi hanima, hinadear ni tanoh in ma panganonnima. [13]

²⁰Tapi anggo mangengkar hanima anjaha manlawan, podang ma mangankon hanima, sonai do ihatahon pamangan ni Jahowa.” [14]

²¹Sonaha do parjadi ni huta na bujur in gabe boru jalang? Gok hinan habonaron ijai, anjaha hapintoron marianan ibagas, hape sonari gok pamunuh! [15]

²²Pirakmu salih do gabe timah, anggurmu maragu bani bah. [16]

²³Pambobai panggeori, hasoman ni panangko, ganupan sidea mangkarosuhkon sisip anjaha mangindahi sibere-bere. Seng iapiti sidea halak na tading maetek anjaha pangaduan ni parinangon na mabalu seng ijalo sidea. [17]

²⁴Halani ai nini Tuhan Jahowa Zebaot, Pargogoh ni Israel do, “Sai marpuas-puas do uhur-Hu bahenon-Ku mangidah imbang-Ku, anjaha balaskonon-Ku do munsuh-Ku. [18]

²⁵Ulakan-Ku do mangonai tangan hubam, tapi papitahon-Ku do ho songon bosi buruk-buruk anjaha padaohon-Ku do humbam timah-timahmu. [19]

²⁶Anjaha pasuangon-Ku do bam panguhum songon na bani mulani ampa panuturi songon sapari; dob ai goranon ma ho huta hapintoron, huta na bujur. [20]

²⁷Ai tobuson do Sion marhitei habonaron anjaha pangisini na paubahkon uhurni marhitei hapintoron. [21]

²⁸Tapi siapkononkon do sipanggeori ampa pardousa rap-rap, anjaha bois do sagala na manadingkon Jahowa. [22]

²⁹Ai maningon maila do hanima halani hayu jabi-jabi, na hinarosuhkonnima hinan, anjaha maila do hanima halani pohon na pinilihnima. [23]

³⁰Ai maningon gabe songon hayu jabi-jabi do hanima, na melus bulungni, anjaha songon pohon na so marbah.

³¹Halak parkuasa gabe songon bonang hori, pambahenanni songon palian ni apuy, haduasi rap mosog, seng dong na mangintopi.” [24]