Read Batak Simalungun JESAYA 10 Bible Online

JESAYA 10 - Batak Simalungun bible

JESAYA 10

¹Bursik ma halak, na mambahen aturan na so pintor, ampa si panurat, na manuratkon odoh-odoh,

²laho papeletkon pahara ni halak na masombuh, anjaha manrampas hak ni halak na musil i tongah-tongah ni bangsang-Ku, ase naboru na mabalu gabe taban-taban bani sidea, anjaha halak na tading maetek gabe sirampokan ni sidea.

³Tapi aha ma na sihol bahenonnima bani ari pambalason ampa bani haba-haba na sihol roh humbani na daoh? Bani ise ma hanima maporus mangindo pangurupion? Ija do tadingkononnima habayakonnima?

⁴On do hansa: Unduk i tongah-tongah ni halak na tartaban, atap tibal i tongah-tongah ni halak na iraseihon. Sonai pe ganupan ai lape surut ringis-Ni, tongtong ope gostong tangan-Ni. [105]

⁵Bursik ma Assur lonsing-lonsing ni ringis-Hu ampa simambu ni ringis-Ku. [106]

⁶Bani bangsa parjahat do ia Husuruh, anjaha bani bangsa sigilaan-Ku do ia Huparentahkon, laho manrampas sirampason ampa manaban sitabanon, laho manrojatisi songon hubang i alaman.

⁷Tapi anggo ia seng sonai sura-surani, anjaha uhurni seng sonai tujuanni; tapi sihol marripaskon do uhurni, anjaha mamboiskon bangsa-bangsa, seng otik, [107]

⁸ai nini do, “Ai lang raja do ganup gamot-gamotku? [108]

⁹Ai lang songon na bani huta Karkemis do masa bani Kalno? Barang songon na bani Arpad masa bani Hamat? Barang songon na bani Samaria masa bani Damaskus?

¹⁰Songon pangonai ni tanganku bani harajaon na marsisombah-sombahon, na margana-gana sibueinan marimbang na i Jerusalem ampa na i Samaria, [109]

¹¹mintor lang ma bahenonku bani Jerusalem ampa bani gana-ganani songon na dob hubahen bani Samaria ampa bani gana-ganani.”

¹²Tapi dob isaloseihon Tuhan ganup horja-Ni i Dolog Sion ampa i Jerusalem, luluhonon-Ni ma pangenjengon ni Raja Assur ampa mapas ni pangkawahni. [110]

¹³Ai nini do, “Marhitei hagogohon ni tanganku do hubahen ai anjaha marhitei hapentaranku, ai na pantas do ahu. Ahu do na mammasabkon parbalogan ni bangsa-bangsa anjaha hurampas arta-artani, anjaha songon puanglima hupaturun do sagala na marparatas.

¹⁴Jumpah tanganku do habayakon ni bangsa-bangsa songon asar ni manuk-manuk, anjaha songon halak na manjomputi tolur na dob tinadingkon, sonai do hupatumpu ganup tanoh on, seng dong na paherbang habong, atap na pangangang pagut atap na marsiok pe.

¹⁵Mintor manggagah ma tangkei dompak halak na manahahonsi, atap mangunsagah ma sihit dompak halak na manariksi? Tungkot ma gakni mangangkat halak na manjolomsi, atap simambu ma gakni manjomput halak, na so hayu ai?” [111]

¹⁶Halani ai tongoson ni Tuhan Jahowa Zebaot do tirahap hu tongah-tongah ni halakni na mombur, anjaha pagaraon do pinurun i toruh ni hasangaponni, songon gara ni apuy. [112]

¹⁷Anjaha panondang ni Israel do gabe songon apuy, anjaha na pansing-Ni gabe jirlam ni apuy, laho mangankon anjaha mamboiskon suga-sugani, hupi-hupini ibagas na sadari.

¹⁸Hamuliaon ni haranganni ampa jumani boiskononni do, hosah ronsi badan, songon parmerung ni naboritan parmerungni.

¹⁹Hayuni na tading i harangan boi hiraon, dakdanak pe boi ma manuratkon.

²⁰Bani ari ai, teba-teba humbani Israel ampa na maluah humbani ginompar ni si Jakob, lang be mangunsandei bani halak na mambogbogsi, tapi bani Jahowa, Na Pansing ni Israel mando sidea mangunsandei ibagas hasintongan.

²¹Teba-teba do na mulak, teba-teba humbani si Jakob mulak hubani Naibata na gogoh in. [113]

²²Age pe songon horsik i topi ni laut bangsamu ale Israel, teba-teba do hansa hunjai na mulak, domma iputuskon hamagouan, marhitei parsampur ni hapintoron-Ni. [114]

²³Tongon hasedaon na dob iputuskon Tuhan Jahowa Zebaot pasaudon-Ni do i tongah-tongah ni sab tanoh on. [115]

²⁴Halani ai sonon do nini Tuhan Jahowa Zebaot, “Ulang hanima mabiar dompak Assur, ale bangsang-Ku, na marianan i Sion, age pe ibogbog hanima marhitei libas-libas anjaha iondamkon simambuni bam, songon binahen ni Masir. (2 Mus. 14)

²⁵Ai otik nari mando, marpunsa ma ringis-Ku, anjaha marbalik ma ringis-Ku bani sidea laho mamboiskon.”

²⁶Jadi sintakon ni Jahowa Zebaot ma lonsing-lonsing dompak sidea songon na binahen-Ni manlonsing halak Midian dohorhon Dolog Batu Oreb, anjaha angkaton-Ni do tungkot-Ni i babou ni laut, songon na bani halak Masir ijia. [116]

²⁷Bani ari ai mosor ma rodi-Ni humbani abaramu, ampa pasangan-Ni laho ma humbani tangkuhukmu.

²⁸Tangkog do ia hun Rimon, das ma ia hu Ayat, mamontas ma ia hun Migron anjaha i Mikmas ipatumpu ugas-ugasni.

²⁹Ibontas sidea ma lombang ai, i Geba do sidea marborngin; gobir do Rama, maporus ia Gibea-Saul. [117]

³⁰Taur-taur ma ho ale boru Gallim! Tangar ma, ale Laisa! Balosi ma ia, ale Anatot! [118]

³¹Maporus do Madmena, pangisi ni Gebim lintun mangindahi parbansahan.

³²Sadari on ope das do ia i Nob, iondamkon tanganni dompak dolog ni boru Sion, dompak buntu-buntu ni Jerusalem. [119]

³³Tonggor ma, Tuhan Jahowa Zebaot do manultuli dangkah marhasoman kuasa na majangin; iroboh do panuntunni anjaha ipatoruh na matabun.

³⁴Iimas do tombak marhitei hapak bosi, anjaha Libanon rap pakon hayuni na banggal-banggal ai marumbak ma.