Read Batak Simalungun JESAYA 11 Bible Online

JESAYA 11 - Batak Simalungun bible

JESAYA 11

¹ Dob ai mandarat ma sada tunas humbani tutuho ni si Isai, anjaha marbuah sada tumbor na roh humbani uratni. [120]

² Sogop ma hubani Tonduy ni Jahowa, tonduy hauhuron ampa pangarusion, tonduy panuturion ampa hagogohon, tonduy habotohon ampa biar bani Jahowa. [121]

³Harosuh ni uhurni ai ma marhabiaran bani Jahowa. Seng mangihutkon pangidah ni matani ia manguhumi, anjaha seng mangihutkon pambogei ni pinggolni ia mamutuskon.

⁴Tapi marhitei hapintoron do uhumanni halak na masombuh, anjaha marhitei hasintongon do dabuhonni timbangan bani halak na madoyuk i nagori in. Marhitei simambu ni pamanganni do libasonni halak sipangodoh-odoh, anjaha marhitei hosah ni bibirni bunuhonni halak parjahat. [122]

⁵Hapintoron do gondit ni binongeini, anjaha hasintongan do bonting ni angkulani.

⁶Jadi rap marianan ma sorigala ampa biribiri, anjaha manggompang begu i lambung ni hambing; rap manggagat ma anak ni lombu pakon anak ni singa, anjaha dakdanak do na marmahan sidea. [123]

⁷Lombu pakon gipul rap manggagat, anak ni sidea rap manggompang, singa mangan poyon-poyon songon lombu.

⁸Dakdanak na inumon marguro-guro i lambung liang ni ulog darih, anjaha dakdanak na sirang minum manjukjukkon tanganni hu ruang ni ulog na marbisa. [124]

⁹Seng be manjahati atap mangagou be sidea bani sab dolog-Ku na pansing in, tongon habotohon pasal Jahowa do manggoki tanoh in, songon bah na manggoki laut. [125]

¹⁰Bani ari ai roh ma pindah-pindah halak si pajuh begu-begu bani urat ni si Isai, na pinajongjong songon mandera partanda bani bangsa-bangsa, gabe marmulia ma iananni. [126]

¹¹Bani panorang ai ulakan ni Jahowa ma pagostong tangan-Ni, laho manobus teba-teba ni bangsa-Ni na tading ope i Assur, i Masir, i Patros, i Etiopia, i Elam, i Sinear, i Hamat ampa i pulou-pulou na i laut. [127]

¹²Pajongjongon-Ni ma sada mandera partanda bani bangsa si pajuh begu-begu, anjaha patumpuon-Ni ma sagala na binuang humbani Israel ampa na merap humbani Juda; ipatumpu do sidea humbani deisa na ompat i tanoh on.

¹³Jadi maronti ma parsimburuon ni Efraim, anjaha iboiskon ma na manosak Juda. Seng be simburu Efraim bani Juda anjaha Juda seng be sosakonni Efraim. [128]

¹⁴Tapi rap ma sidea habang bani raboyon ni halak Palistim dompak hasundutan, rap do sidea manrampas dompak halak parhapoltakan. Edom pakon Moab patundukon ni tangan ni sidea do, anjaha ginompar ni Amon mambalosi bani sidea.

¹⁵Anjaha pahorahon ni Jahowa do laut tadur ni Masir, anjaha ondamkonon-Ni tangan-Ni hu bani Bah Eprat marhitei milas ni hosah-Ni, anjaha bogbogon-Ni do ai gabe pitu binanga, gabe boi diparan marsipatu.

¹⁶Gabe dong ma dalan na bolon sada bani teba-teba ni bangsa-Ni, na tading hun Assur, songon na bani Israel sanggah mandarat sidea hun tanoh Masir. [129]