Read Batak Simalungun JESAYA 13 Bible Online

JESAYA 13 - Batak Simalungun bible

JESAYA 13

¹Pangungkabon pasal Babel, na nididah ni si Jesaya, anak ni si Amos. [133]

²Pajongjong hanima ma mandera partanda bani dolog na leseng, pagomos ma martaur bani sidea; hilapkon hanima ma tangannima, ase masuk sidea humbani horbangan ni halak na sangap-sangap! [134]

³Ahu na dob mamarentahkon hubani halak na Hupapansing, domma Huhara puanglima-Ku, na roh garang marsurak, laho padalankon ringis-Ku,

⁴tangar, sora na gosou bani dolog songon sora ni bala na buei! Tangar, sora na guyu bani harajaon-harajaon, bangsa-bangsa na roh martumpu! Jahowa Zebaot patitirhon bala laho marmunsuh.

⁵Na roh do sidea humbani nagori na daoh, humbani ujung ni langit, Jahowa ampa sinjata ni ringis-Ni, laho mamboiskon ganup tanoh in.

⁶Mandoruh ma hanima, ai dohor do ari ni Jahowa, songon hasedaon humbani Siparkuasa in do parroh-Ni. [135]

⁷Halani ai galek ma sagala tangan, madotei uhur ni ganup halak,

⁸anjaha tarsonggot sidea. Hajorgongon ampa pangarouon do mandorab sidea, mangarou do sidea songon naboru na laho tubuhan tuah, marsinonoan do sidea, gerger bohini songon narnar.

⁹Tonggor ma, na roh ma ari ni Jahowa, jangin marhasoman gila ampa ringis na gajag, laho mambahen halimisan tanoh in ampa laho mamboiskon pardousa hunjai.

¹⁰Ai sagala bintang na i langit ampa bintang pariama seng be bereonni sinalsalni; golap do mata ni ari bani parpoltakanni, anjaha bulan seng marsinondang. [136]

¹¹Balaskonon-Ku do bani dunia on hajahatonni, ampa bani halak parjahat salahni, parontihonon-Ku ma pangenjengon ni halak si gijang uhur, anjaha patoruhon-Ku do gijang ni uhur ni halak siunsagahkon gogoh.

¹²Bahenon-Ku ma jolma jarangan humbani omas pitah, anjaha manisia jarangan humbani omas Opir. [137]

¹³Halani ai dugur ma langit anjaha tanoh on mosor humbani iananni, halani gila ni Jahowa Zebaot bani panorang pargajag ni ringis-Ni. [138]

¹⁴Jadi songon ursa na binuru, anjaha songon biribiri na so marparmahan, mulak ganup sidea bani bangsani anjaha maporus ganup hu nagorini.

¹⁵Sagala na dapot ai itiham, anjaha sagala na tartangkap ai matei ibahen podang.

¹⁶Irosaki do dakdanak ni sidea ididah matani, hona rampas rumah ni sidea, anjaha na binuat ni sidea ibutaki. [139]

¹⁷Tonggor ma, pajujuon-Ku ma halak Madai mangimbang sidea, na so impolan bani pirak anjaha na so mangkamegahkon omas.

¹⁸Raseihonon ni sior ni sidea do garama-garama, seng holong uhur ni sidea bani boras ni boltok, anjaha seng ihargai panonggor ni sidea dakdanak. [140]

¹⁹Anjaha masa ma bani Babel, bungaran ni harajaon-harajaon, hamegahon ampa hamuliaon bani halak Kasdim, songon na masa bani Sodom ampa Gomora, sanggah na ibalikkon Naibata ai.

²⁰Seng be iankonon ai lalab atap hundulan ai marsundut-sundut; seng dong be halak Arab na marlampolampo ijai, anjaha parmahan seng be marlampolampo ijai.

²¹Tapi binatang na i halimisan do manggompang ijai, anjaha langkupa manggoki rumah ni sidea; marianan do ijai burung unta, anjaha manortori do ijai setan-setan. [141]

²²Baliang harangan do markaing-kaing bani lopou ni sidea, anjaha sorigala i rumah bolon ni sidea. Dohor ma roh panorangni, anjaha seng be paganjangon ari-arini. [142]