Read Batak Simalungun JESAYA 17 Bible Online

JESAYA 17 - Batak Simalungun bible

JESAYA 17

¹Pangungkabon pasal Damaskus, “Tonggor ma, masabkononkon do Damaskus, ase ulang be kota ai, gabe timbunan batu ma ai. [168]

²Tarulang ma huta-huta ni Aroer, gabe ianan ni pinahan-pinahan ma ai, panggompangan bani sidea anjaha ise pe lang be na mangkirjati sidea.

³Masab ma benteng-benteng hun Efraim ampa harajaon hun Damaskus; anjaha teba-teba ni Aram gabe songon hamuliaon ni Israel ma, nini Jahowa Zebaot. [169]

⁴Bani ari ai sipaoruon do hamuliaon ni Jakob, anjaha dagingni na mombur ai pamerungon do.

⁵Sonon ma parjadini, songon panabi na manjormak gandum sisabion anjaha tanganni manabi buyurni, songon halak na manjomputi buyur i pamah Repaim.

⁶Tapi dong ope tading turiangni, songon sanggah na mandugur hayu jetun, dua atap tolu daoh i atas, ompat atap lima bani dangkahni, sonai do nini Jahowa, Naibata, pasal Israel.

⁷Bani ari ai kawahkonon ni jolma in ma na manompasi, anjaha matani mangidah Na Pansing ni Israel.

⁸Seng be kawahkononni anjapanjap na tinukangan ni tanganni, anjaha na pinauli ni jari-jarini seng be tataponni, ai ma Asera atap gana-ganani mata ni ari.

⁹Bani ari ai huta na pinatoguhnima ai doskon ianan na tinadingkon ni halak Hefi pakon halak Amori ma ai, ai ma na tinadingkon ni sidea, sanggah maporus i lobei ni halak Israel, gabe tarulang.

¹⁰Ai ihalupahon ho do Naibata ni haluahonmu, anjaha dolog batu ni hagogohonmu lang idingat ho. Halani ai age ipungkah ho pohon na jenges anjaha isuan ho hujai ranting ni hayu anggur humbani nagori na legan, [170]

¹¹bani ari isuan ho ai, boi tubuh ibahen ho, anjaha sogod sanggah itidahkon ho ai, marbunga ibahen ho -- tapi magou do pariama ai bani panorang sitaronon ampa pusok ni uhur na so tartambari.”

¹²Bursik ma! Hageoron ni bangsa-bangsa na buei in, na geor songon pargeor ni laut, pargilumbang ni hajolmaon, na marhasak songon bah marbanggal.

¹³Songon pardorom ni bah marbanggal do pardorom ni bangsa-bangsa, tapi mangonai hata do Ia bani sidea, gabe maporus ma sidea daoh, mapurpur songon lamlam i buntu-buntu niombus ni logou, anjaha songon orbuk na habang binahen ni halisungsung. [171]

¹⁴Bodari-bodari, tonggor ma, songgot-songgot! Paima siang ari, seng ijin be! Ai ma rupei ni halak na manaban hita ampa parbagianan ni halak na manrampas hita. [172]