Read Batak Simalungun JESAYA 18 Bible Online

JESAYA 18 - Batak Simalungun bible

JESAYA 18

¹Bursik ma tanoh, na gok parngongos na habang, na i dipar ni Bah Kus, [173]

²na paingkat suruhanni hun Bah Nil, bani solu hotang mamontas bah! Bingkat ma hanima, ale suruhan na hinsah, bani bangsa parangkula na bolon anjaha na lemes, bani bangsa na hinabiaran ni halak na dohor ampa na daoh, bani sada bangsa na gogoh anjaha sipartaban, partanoh na binontas ni bah banggal.

³Hanima haganup pangisi ni dunia on, hanima na marianan i tanoh on, anggo ipajongjong mandera partanda i atas dolog, kawahkon hanima ma ai, anjaha anggo isompul tarompit tangihon hanima ai!

⁴Ai sonon do hata ni Jahowa hu bangku, “Sipsip do Ahu manorih-norih humbani ianan-Ku, songon milas ni ari bani pardeteng ni mata ni ari, songon hombun na borat musim pariama.

⁵Tongon, paima pariama, dob salpu panorang marbunga, lape matoras buahni, rotaponni ma dangkahni marhitei pisou pamotong anjaha tagilonni ma ranting-rantingni.

⁶Tadingkonon ni sidea ma ai ganup bani manuk-manuk panoroh na i dolog ampa bani binatang na i tanoh in. Manuk-manuk panoroh do marianan ijai musim milas, anjaha binatang na i tanoh in do marianan ijai musim borgoh.

⁷Bani panorang ai marrohan ma sibere-bere bani Jahowa Zebaot, humbani bangsa parangkula na bolon anjaha na lemes, bangsa na hinabiaran ni halak na dohor ampa na daoh, bangsa na gogoh anjaha si partaban, partanoh na binontas ni bah banggal, hu Dolog Sion, ianan ni goran ni Jahowa Zebaot.” [174]