Read Batak Simalungun JESAYA 19 Bible Online

JESAYA 19 - Batak Simalungun bible

JESAYA 19

¹Pangungkabon pasal Masir. Tonggor ma, margareta bani hombun na doras do Jahowa, anjaha das ma Ia hu Masir. Jadi hitir ma si sombah-sombahon ni Masir i lobei-Ni, anjaha malala uhur ni halak Masir ibagas. [175]

²Pajobuon-Ku do Masir dompak Masir, ase sidea marsimunsuhan samah sidea sanina dompak sanina, hasoman dompak hasoman, huta dompak huta, harajaon dompak harajaon.

³Sipalumbaon do tonduy ni halak Masir ibagas anjaha georon-Ku do riah ni sidea; jadi sungkun-sungkun ma sidea bani si sombahon ni sidea, ampa bani datu ni sidea, bani paniaran ampa si partondung. [176]

⁴Anjaha ondoskonon-Ku do Masir hubagas tangan ni pamarentah na mabisang anjaha raja na koras parrajai bani sidea, nini Tuhan Jahowa Zebaot.

⁵Horah ma bah na bani Nil, marsik anjaha horing ma bah mardalan.

⁶Marbau ma bah hurakan, lambin damok anjaha horah ma bah ni Masir, arung-arung pakon tolong melus.

⁷Sampalan na bani Bah Nil, poyon-poyon na i topi ni ampa haganup bonih na sinabur ijai, melus ma, ihabangkon logou gabe seng dong be.

⁸Marhoru ma si pardengke anjaha marhoih sagala si pangkail i Bah Nil; anjaha halak si parjala bani bah ai mangorong.

⁹Jut do uhur ni halak si horjahon tali rami, anjaha marposi bohi ni si palemes tali rami ampa si partonun.

¹⁰Marumbak do basikah ni tanoh ai, anjaha sagala si pangan gaji marhoru.

¹¹Lontong tumang do gamot-gamot na i Soan, ai ma panuturi na pentar bani Parao, bodoh do pangajarini. Ija ma boi tarluarhon hanima bani Parao: Anak ni na maruhur do ahu, anjaha anak ni raja humbani sapari. [177]

¹²Ija do siparuhurnima ai? Ipatugah ma bannima anjaha ipabotohkon ma, atap aha do ranggian ni Jahowa Zebaot bani Masir!

¹³Gabe na oto do gamot-gamot na i Soan, anjaha hona oto-otoan na sangap-sangap na hun Nop; kahou do Masir ibahen kopala ni marga-marga.

¹⁴Iuseihon Jahowa do tonduy hakahouon hubagas uhur ni sidea, gabe ipakahou sidea do Masir bani sagala pambahenanni songon si parmabuk na margulu bani utah-utahni. [178]

¹⁵Gabe seng manjadi horja na hinorjahon i Masir, marhitei ulu atap ihur, marhitei dangkah ni palem atap arung-arung. [179]

¹⁶Bani panorang ai gabe doskon inang-inang ma halak Masir, gobir anjaha hitir bani tangan ni Jahowa Zebaot, na niondamkon-Ni dompak sidea.

¹⁷Gabe songgot-songgot ma tanoh Juda bani Masir; anggo itarsingati ai bani, gobir ma ia halani ranggian ni Jahowa, na niranggihon-Ni dompak sidea.

¹⁸Bani ari ai dong ma lima huta i Masir, na mansahapkon sahap Kanaan anjaha na marbulawan hubani Jahowa Zebaot. Ir-Heres do goran ni sada humbani huta ai. [180]

¹⁹Bani ari ai dong ma anjapanjap bani Jahowa i tongah-tongah ni tanoh Masir ampa tiang pardingatan bani Jahowa dohorhon parbaloganni. [181]

²⁰Gabe tanda ampa saksi ma ai bani Jahowa Zebaot i tanoh Masir; anggo doruh-doruh sidea bani Jahowa halani si pangodoh-odoh, jadi tongoson-Ni ma bani sidea sipaluah, anjaha Ia do marporang laho paluahkon sidea.

²¹Jadi patandahonon ni Jahowa ma diri-Ni bani halak Masir, anjaha tandaon ni halak Masir ma Jahowa bani ari ai; galangkonon ni sidea ma galangan sisayaton ampa galangan sipanganon, anjaha marbagah-bagah ma sidea bani Jahowa, anjaha suhunan ni sidea do ai. [182]

²²Lonsingon ni Jahowa do Masir, ilonsing tapi itambari; mulak do sidea bani Jahowa, marpangulaki do uhur-Ni bani sidea, anjaha pamalumon-Ni do sidea.

²³Bani ari ai dong ma pasar hun Masir hu Assur; roh ma Assur hu Masir anjaha Masir hu Assur, rap manombah ma Masir pakon Assur bani Jahowa.

²⁴Bani ari ai gabe patoluhon ma Israel i lambung ni Masir pakon Assur, jadi pasu-pasu i tongah-tongah ni tanoh on,

²⁵na pinasu-pasu ni Jahowa Zebaot, nini, “Pinasu-pasu ma Masir, bangsang-Ku, ampa Assur, jadi-jadian ni tangan-Ku, ampa Israel parbagianan-Ku.” [183]