Read Batak Simalungun JESAYA 20 Bible Online

JESAYA 20 - Batak Simalungun bible

JESAYA 20

¹Bani tahun parroh ni Tartan hu Asdod, na sinuruh ni si Sargon, raja ni Assur, na mamorang huta Asdod anjaha na patundukkon ai, [184]

²bani panorang ai ma marsahap Jahowa marhitei si Jesaya, anak ni si Amos nini ma, “Laho ma ho, tanggali ma baju guni in humbani binongeimu ampa sipatumin humbani naheimu!” Jadi ibahen ma sonai, mardalan ma ia talanjang anjaha seng marsipatu. [185]

³Nini Jahowa ma, “Songon juakjuak-Ku si Jesaya, mardalan talanjang anjaha seng marsipatu tolu tahun dokahni gabe tanda ampa tuduh-tuduh dompak Masir ampa Etiopia,

⁴sonai ma boanon ni Raja Assur halak na tartaban hun Masir ampa halak na tarbuang hun Etiopia, na maposo ampa na matua, talanjang anjaha seng marsipatu, sae-sae hundulanni, gabe habadoron bani halak Masir.

⁵Jadi tarsonggot ma sidea anjaha maila halani Etiopia hatengeran ni uhurni, ampa halani Masir na pinangunsagahkon ni sidea.

⁶Anjaha halak na marianan i topi laut, hatahononni ma bani ari ai, ʻTonggor ma, sonon do hape na masa bani jolma hatengeran ni uhurta ampa haporusanta, andohar iurupi anjaha ipaluah hita humbani raja ni Assur! Sonaha ma tarbahen hita maluah?ʼ ”