Read Batak Simalungun JESAYA 21 Bible Online

JESAYA 21 - Batak Simalungun bible

JESAYA 21

¹Pangungkabon pasal halimisan laut. Songon halisungsung na marpuyuh-puyuh i tanoh dangsina, sonai do parrohni hun halimisan, humbani tanoh na majangin. [186]

²Pangungkabon na parah do ipatalar bangku, “Sipanamun manamun, sipanaban manaban. Tangkog ho, ale Elam! Hubu ma, ale Madai! Ganup hoih-hoih parontihononku do!

³Halani ai gok do binongeihu bani na maborit, pangarouon do mandorab ahu, songon pangarouon ni parinangon na sihol tubuhan tuah; mangirput do ahu manangar ai, malitonduy mangidahsi.

⁴Minggot do huahap, hitir-hitir ibahen songgotni; panorang bodari na huharosuhkon, gabe hagobiron do bangku.”

⁵Ipasirsir sidea do sipanganon bani meja, iamparhon parmadani, mangan minum sidea. Hehe ma, ale raja-raja! Minaki gantar!

⁶Ai sonon do hata ni Tuhan bangku, “Lao ho, suruh parjaga marjaga, na nididahni hatahon ipatugah!

⁷Anggo ididah sipangajak huda na marpasangan siajak halode, siajak unta, pangkei ma itangihon ai, pangkei tumang.

⁸Jadi idilohon ma, ʻBani panungkir-nungkiran do ahu jongjong, Ham Tuhan, tongtong ari-ari, anjaha bani parjagaanku do ahu jongjong ganup borngin.ʼ [187]

⁹Anjaha, tonggor ma, andon roh sipangajak, huda na pinasang! Jadi ibalosi, itaurhon ma, ʻDomma talu, domma talu Babel, anjaha sagala gana-gana sisombahon ni sidea domma irosaki hu tanoh.ʼ [188]

¹⁰Ale bangsangku, na nidogei-dogei anjaha na nirojatan, na hubogei humbani Jahowa Zebaot, Naibata ni Israel, ai do hubaritahon bani nasiam.”

¹¹Pangungkabon Pasal Duma. Dong do na dilo-dilo bangku hun Seir, “Ale parjaga, sonaha ma nuan borngin? Ale parjaga, sonaha ma nuan borngin? [189]

¹²Nini siparjaga, ʻLaho siang ma ari, tapi homa na roh ma borngin.ʼ Anggo sihol manungkun ope nasiam, roh ma nasiam use laho manungkun.”

¹³Pangungkabon Pasal Arab. Bani harangan ni Arab ma nasiam marborngin, ale partiga-tiga ni Dedan. [190]

¹⁴Jumpahkon nasiam ma halak na horahan, boan nasiam bah, ale parnagori Tema. Bere nasiam ma ruti bani halak na maporus. [191]

¹⁵Ai maporus do sidea humbani podang, humbani podang na sinintak, ampa humbani sior na gistang ampa humbani jobu ni parporangan.

¹⁶Ai sonon do ihatahon Tuhan hu bangku, “Ibagas satahun nari, domu hubani tahun ni anak gajian, jadi bois ma ganup hamuliaon ni Kedar. [192]

¹⁷Anjaha na teba humbani bilangan ni puanglima siparsior humbani halak Kedar lambin otikni ma, tongon, Jahowa Naibata ni Israel do na mangkatahon ai.”