Read Batak Simalungun JESAYA 22 Bible Online

JESAYA 22 - Batak Simalungun bible

JESAYA 22

¹Pangungkabon Pasal Pamah Panonggoran. Mangaha ho, ase naik ho ganup hu atas tayub, [193]

²ho ale huta na gok surak-surak, na ramei anjaha na marmegah-megah? Na matei ma in, sedo niraseihon ni podang ai, anjaha seng matei i parporangan.

³Haganup pambobaimu rap do maporus, haganup sidea itangkapi seng pala marsior, ganup do dapot humbam rap-rap do isangkuti, age pe domma daoh sidea maporus.

⁴Halani ai ningku do, “Padaoh hanima pangkawahnima humbangku. Ulang sai inunut hanima mangapohi ahu pasal hasedaon ni boru ni bangsang-Ku.” [194]

⁵Ai ari hageoron, hasedaon ampa hasonggoton do ipamasa Tuhan Jahowa Zebaot i pamah panonggoran; tembok na mangkaseda ampa doruh-doruh na maraloling das hu dolog.

⁶Ibuha Elam do parpanahan, ipasirsir gareta pakon huda; ipataridahkon Kir do gantarni. [195]

⁷Habungan pilihanmu igoki gareta porang, anjaha siajak huda mangurup horbanganmu.

⁸Jadi ibuka halak ma onding-onding ni Juda, anjaha bani ari ai mangkawah ma ho bani sinjata na i rumah tombak, [196]

⁹ampa bani rigat ni huta ni si Daud, anjaha ididah hanima ma sonaha bueini; ipatumpu hanima ma bah hun bani [197]

¹⁰anjaha ibilangi hanima rumah na i Jerusalem, iparseda hanima rumah laho patoguhkon tembok. [198]

¹¹Ipauli hanima do bongbongan i holangkolang ni tembok na dua in, partumpuan ni bah humbani bongbongan hinan. Tapi seng mangkawah hanima dompak na mambahensi, anjaha seng ipardiateihon hanima Ia na mangadongkon in humbani sapari. [199]

¹²Bani ari ai idilohon Tuhan Jahowa Zebaot do, ase tangis anjaha doruh-doruh, ase ipalpali uluni anjaha marhiou guni namin,

¹³tapi tonggor ma, malas ni uhur ampa olob-olob, manayati horbou ampa manambolih biribiri, mangan gulei ampa minum anggur, nini sidea: Mangan minum ma hita, ai patar matei ma hita. [200]

¹⁴Domma ipatalar Jahowa Zebaot bangku, “Seng sasapon be hajahatonnima on, paima matei hanima, nini Tuhan Jahowa Zebaot.” [201]

¹⁵Sonon do hata ni Tuhan Jahowa Zebaot, “Laho ma ho mangayaki sijaga arta ai, ai ma si Sebna, kopala ni rumah bolon, anjaha hatahon ma hu bani,

¹⁶ʻMangaha ho ijon anjaha ise sitanomonmu ijon, ase ihurak ho tanoman bam ijon, ale na mangkurak tanoman bani ianan na gijang anjaha na manuhil ianan ibagas dolog batu?ʼ

¹⁷Tonggor ma, sampakkonon ni Jahowa ma ho gogoh-gogoh, ale halak na bisang. Joroton-Ni ma ho poltik-poltik,

¹⁸parpunukon-Ni ma ho, anjaha gijigkonon-Ni ma ho songon bola hu tanoh na madaoh, daoh tumang. Ijai ma ho matei, anjaha ijai ma gareta hasangaponmu, ho ale sibahen habadoron bani rumah ni tuanmu.

¹⁹Jullakkonon-Ni ma ho humbani hajongjonganmu anjaha humbani hundulanmu dabuhkonon-Ni do ho.”

²⁰Bani ari ai diloon-Ku ma juakjuak-Ku si Eliakim, anak ni si Hilkia. [202]

²¹Jadi pakeihonon-Ku ma pakeianmu hu bani, anjaha gonditmu gonditkonon-Ku hu bani; anjaha kuasamu ondoskonon-Ku hubagas tanganni, anjaha ia ma gabe bapa bani par Jerusalem pakon bani ginompar ni Juda.

²²Tampeihonon-Ku do anakkunsi ni rumah ni si Daud bani abarani; anjaha ia ma mangungkab, seng dong na mangkunsi, anjaha ia mangkunsi, seng dong na mangungkab. [203]

²³Patotapon-Ku ma ia songon paku bani ianan na toguh, jadi gabe hotak hamuliaon ma ia bani ginompar ni bapani. [204]

²⁴Jadi margantung hu bani ma hajojor ganup ginompar ni bapani, ai ma dangkah pakon tunas, ganup parugas na etek-etek, pinggan ampa bongkor.

²⁵Bani ari ai, nini Tuhan Jahowa Zebaot, mullus ma paku, na dob pinatotap ai bani ianan na toguh, ponggol anjaha madabuh lanjar puntar ma boban na bani ai, tongon, sonai do ihatahon Jahowa.