Read Batak Simalungun JESAYA 23 Bible Online

JESAYA 23 - Batak Simalungun bible

JESAYA 23

¹Pangungkabon Pasal Tirus: Mandoruhi ma, ale kapal Tarsis, ai domma iparseda, seng dong rumah-rumah be. Sanggah mulak hun tanoh Kittim (Cyprus) tarbogei ai bani sidea. [205]

²Sip ma hanima na marianan i topi laut, partiga-tiga na i Sidon; suruhanmu do mandipari laut.

³Manlopusi laut bolag do iboban bam gandum si Sihor ampa pariama ni Nil, ho do gabe partiga-tiga ni bangsa-bangsa.

⁴Bador ma ho ale Sidon, ai domma marsahap laut, benteng ni laut in: Seng be mangarou anak ahu barang mantubuhkon, seng pagodang-godang anak garama be ahu atap anak boru. [206]

⁵Bani na das barita ai hu Masir, tarsonggot ma sidea songon sanggah na mambogei barita ni Tirus.

⁶Mandipar ma hanima hu Tarsis, mandoruhi ma hanima, na marianan i topi ni laut!

⁷Ai on do hutanima na mariah ai, na tinombei bani na basaia, parbingkatan nasiam laho manginsolat bani tanoh na daoh?

⁸Ise do na mansurahon sisonai pasal Tirus, sibagihon sortali-sortali, saudagarni songon raja-raja, anjaha partiga-tigani halak pinarsangapan i tanoh on? [207]

⁹Jahowa Zebaot do na mansurahon ai, laho pahirihon hasangapon na gok hatoalon, laho patoruhkon halak na banggal i dunia on.

¹⁰Ornangi ma tanohmu, songon na bani Bah Nil, ho, ale boru Tarsis; seng dong be kapal. [208]

¹¹Domma ipagostong tangan-Ni hu atas ni laut in, idugur do harajaon-harajaon, domma iparentahkon Jahowa pasal Kanaan, laho mansedahon benteng-bentengni.

¹²Anjaha ihatahon do, “Seng be marolob-olob ho hu lobeian on, ho, ale boru Sidon, na dob pinadorun. Jongjong ma ho, mandipar ma hu Cyprus! Ijai pe seng anjai sonang ho. [209]

¹³Tonggor ma, tanoh ni halak Kasdim! In ma bangsa ai, sedo Assur, na mambahen Sidon gabe ianan ni sorigala. Ipajongjong sidea do manara pangkubu, iparseda sidea istana-istana, anjaha mareong do ibahen sidea huta ai.

¹⁴Mandoruhi ma, ale kapal Tarsis, ai domma iparseda bentengnima!

¹⁵Bani ari ai, halupahononkon ma Tirus pitu puluh tahun dokahni songon dokah ni ari-ari ni sada raja. Tapi dob salpu na pitu puluh tahun ai, masa ma bani Tirus songon bani doding-doding ni boru jalang.

¹⁶Buat ma husapi, dalani ma huta in, ale boru jalang na dop hinalupahon! Padear ma panggiutmu, pabuei ma dodingmu, ase idingat halak ho use!

¹⁷Ai dob salpu sipitu puluh tahun ai, tohuon ni Jahowa do Tirus, gabe mulak ma ia marupah boru jalang; marnriah-riahi do ia pakon sagala harajaon na i dunia on, na bani sab tanoh on.

¹⁸Tapi untungni ampa upahni marboru jalang gabe pinapansing do ai bani Jahowa; seng pahumpulon ai atap ponopkononkon, tapi bani na marianan i lobei ni Jahowa do untungni ai, bahen sipanganon marsulei-sulei ampa pakeian na jenges-jenges.” [210]