Read Batak Simalungun JESAYA 24 Bible Online

JESAYA 24 - Batak Simalungun bible

JESAYA 24

¹Tonggor ma, palumeion anjaha parsedaon ni Jahowa ma tanoh in; pabalikon-Ni ma sisikni anjaha pamerapon-Ni pangisini.

²Gabe doskon simbuei ma malim, doskon juakjuak tuan-tuan; doskon jabolon naboru tuan naboru, doskon sipamboli sipanjual; doskon panraih na paraihkon, anjaha na pautangkon dos pakon siparutang. [211]

³Lungun tumang do tanoh in anjaha bois hona rampas, ai Jahowa do na mangkatahon hata in.

⁴Horu anjaha melus do tanoh in; mangeruti anjaha hurleh do dunia on; na banggal-banggal, jolma na i tanoh in lambin galek.

⁵Anjaha butak do tanoh in ibahen pangisini, ai ilanggar sidea do titah, iparnalang aturan anjaha iosei padan sisadokah ni dokahni.

⁶Halani ai papa do mambondut tanoh in, anjaha pangisini marsitaronon halani panlanggaronni; halani ia imosogkon do pangisi ni tanoh in, anjaha otik mando jolma na tading.

⁷Marhoru do anggur, melus hayu anggur, marhoih-koih sagala siparmalas ni uhur.

⁸Mangadi do malas ni uhur binahen ni tambur, maronti surak-surak ni siparolob-olob, marsaran megah ni uhur binahen ni husapi. [212]

⁹Seng be mandoding-doding sidea sanggah minum anggur, siinuman na koras paet do bani na manginumsi.

¹⁰Domma irumbakkon huta na tarulang in, tutup do sagala rumah gabe seng tarmasuki.

¹¹Doruh-doruh halani lang dong anggur tarbogei i alaman, sundut do sagala malas ni uhur, anjaha misir olob-olob na i tanoh in.

¹²Hasedaon do tading i huta in, marosak do horbanganni itondoli.

¹³Ai sonon do sihol masa i tanoh in i tongah-tongah ni bangsa-bangsa, songon hayu jetun na nidugur, songon na marturiang dob salpu pariama buah anggur. [213]

¹⁴Anggo sidea ipagogoh ma sorani marolob-olob, halani hamuliaon ni Jahowa marsurak-surak do sidea hun hasundutan. [214]

¹⁵Halani ai pasangap nasiam ma Jahowa, ale parhapoltakan, nasiam na bani pulou-pulou, puji nasiam ma goran ni Jahowa Naibata ni Israel.

¹⁶Humbani ujung ni tanoh on ibogei hanami do doding puji-pujian: Hasangapon ma bani Parpintor in. Tapi anggo ahu ningku do, “Magou ma ahu, bursik ma ahu!” Halak partahi-tahi mantahihon, tongon mantahihon do halak partahi-tahi.

¹⁷Hagobiron, godung ampa siding do mangonai bam, ale pangisi ni tanoh in!

¹⁸Barang ise na maporus halani sora ni hagobiron, madabuh do hubagas godung, anjaha atap ise na naik humbagas godung hona siding do. Ai domma ibuha jandela ni langit, anjaha idugur onjolan ni tanoh in. [215]

¹⁹Bolah tumang do tanoh in, mangkarigat anjaha dugur. [216]

²⁰Munjei-unjei do tanoh in songon halak na mabuk, mambal-ambal songon gayang-gayang, ai borat do panlanggaronni ai mardondon bani, gabe dabuh ma ia, anjaha seng tarjongjongkonsi be. [217]

²¹Bani panorang ai marlulu ma Jahowa bani bala na i atas ai, na i babou, pakon bani raja-raja ni tanoh on, na i atas tanoh on. [218]

²²Rap do sidea patumpuon songon halak na tartangkap ibagas godung, tutupon do sidea hubagas tutupan, anjaha dob piga-piga dokah uhumon do sidea. [219]

²³Jadi maila ma bulan anjaha bador mata ni ari, ai Jahowa Zebaot do Raja i Dolog Sion ampa i Jerusalem, anjaha patalaron-Ni do hamuliaon-Ni, i lobei ni sintua-sintua-Ni. [220]