Read Batak Simalungun JESAYA 25 Bible Online

JESAYA 25 - Batak Simalungun bible

JESAYA 25

¹Ale Jahowa, Ham do Naibatangku; sihol patimbulonku do Ham, sihol pujionku do goran-Mu; ai Ham do sibahen halongangan, sipasaud sura-sura na dob niranggihon humbani sapari ibagas hasintongan ampa habujuron. [221]

²Gabe timbunan batu do ibahen Ham huta in, huta na toguh in gabe reong-reong, anjaha istana ni partoloh seng dong be; seng sipaulion be ai lalab.

³Halani ai pasangapon ni bangsa na gogoh ma Ham, anjaha huta ni bangsa na bisang mangkabiari Ham.

⁴Ai Ham do haporusan bani halak na madoyuk, haporusan bani halak na masombuh ibagas hasosakanni, panisioan sanggah haba-haba, parlinggoman sanggah milas ni ari; ai ondam-ondam ni halak sipangodoh-odoh doskon haba-haba do sanggah musim borgoh, [222]

⁵doskon milas ni ari bani ianan na horah. Ipaminop Ham do halutuon ni partoloh, songon na milas nirungkub ni hombun; olob-olob ni sipangodoh-odoh ipasip Ham do.

⁶Jadi bahenon ni Jahowa Zebaot ma bani sagala bangsa i atas dolog on sada pesta na gok sipanganon na mataboh, sada pesta na gok anggur madokah, na gok sipanganon na mataboh ampa utok-utok, na gok anggur na madokah anjaha na pitah. [223]

⁷ Anjaha pasision-Ni ma i atas dolog on parrungkub na nirungkubkon bani sagala bangsa ampa panutup na tinutupkon bani ganup bangsa parbegu. [224]

⁸ Boiskonon-Ni do hamatean ronsi sadokah ni dokahni, anjaha apusan ni Tuhan Jahowa do iluh humbani sagala bohi, anjaha padaohon-Ni do habadoron ni bangsa-Ni hun sab tanoh on; tongon Jahowa do mangkatahon in. [225]

⁹Jadi hatahonon ni halak ma bani ari ai, “Tonggor ma, on do Naibatanta, na niarapkonta laho mangurupi hita. On do Jahowa, na niarapkonta! Marolob-olob anjaha marmalas ni uhur ma hita halani pangurupion-Ni.

¹⁰Tongon, tampei do tangan ni Jahowa i atas dolog on, tapi sidogeian do anggo Moab bani iananni songon anggala sidogeian ibagas godung parhubangan. [226]

¹¹Age pe ipaherbang tanganni ibagas ai songon parlanguy na paherbang tanganni marlanguy, tapi patoruhon ni Jahowa do hagijangonni rap pakon hapandeian ni tanganni.

¹²Anjaha batar-batar ni tembokni na gijang ai patoruhon-Ni do ai, ondunon-Ni, sampakkonon-Ni hu tanoh, hubagas orbuk.”