Read Batak Simalungun JESAYA 26 Bible Online

JESAYA 26 - Batak Simalungun bible

JESAYA 26

¹Bani ari ai dodingkononkon ma doding on i tanoh Juda: Dong do huta na toguh banta, haluahon do ibahen songon tembokni ampa batar-batarni. [227]

²Buhai nasiam ma horbangan, ase bongkot bangsa parpintor, na manjolom habujuron. [228]

³Ipatotap Ham do damei bani uhur na marramotkon damei, tongon Bamu do ai marhatengeran.

⁴Martenger ni uhur ma nasiam tongtong bani Jahowa, dolog batu sisadokah ni dokahni do Tuhan Jahowa. [229]

⁵Tongon, ipatoruh do na marianan bani na gijang, bani huta na tinggi. Iondun do ai, iondun hu tanoh, isampakkon hubagas orbuk.

⁶Dogei-dogeion ni nahei ma ai, nahei ni halak na madorun, langkah-langkah ni halak na masombuh.

⁷Pintor do dalan ni halak parpintor, hornop do ibahen Ham dalan ni halak parpintor.

⁸Age bani panguhumion-Mu, ale Jahowa, Ham do iarapkon hanami, goran-Mu ampa pardingat Bamu do na hinasiholhon ni tonduynami. [230]

⁹Siholan do tonduyhu Bamu borngin, tonduyhu pe ibagas ahu Ham do tongon ipindahi. Ai anggo ihonai uhum-Mu tanoh on, mintor mangguruhon hapintoron do pangisi ni dunia on. [231]

¹⁰Jumpahan idop ni uhur pe halak parjahat, seng iguruhon hapintoron, i tanoh ni halak parpintor pe mambahen hajahaton do ia, seng ididah uhurni hatunggungon ni Jahowa.

¹¹Ham Jahowa, timbul do tangan-Mu, tapi seng ididah sidea in; idahon ni sidea ma ai gabe tarbador; pongut ni uhur bani bangsa-Mu ampa apuy sipangan imbang-Mu do mamboiskon sidea.

¹²Ale Jahowa, Ham do sibere damei bennami, ai Ham do na mambahen saud sagala pambahenannami. [232]

¹³Ham Jahowa Naibatanami, ongga do irajai tuan-tuan, legan ni Ham hanami, tapi Ham tumang, goran-Mu do idingat hanami.

¹⁴Na matei, seng mulak manggoluh, halinoh seng mulak puho; halani ai do ase marlulu Ham laho mamboiskon sidea, anjaha isasap Ham do ganup pardingatan bani sidea.

¹⁵Itambahi Ham do bangsa in, Ham Jahowa, itambahi Ham do bangsa in; ipatimbul Ham do diri-Mu; ipabolag Ham do parbalogan ni tanoh in.

¹⁶ Ham Jahowa, ipindahi sidea do Ham sanggah tarsosak; doruh-doruh do sidea sanggah mangonai ajar-Mu bani sidea. [233]

¹⁷Songon naboru na boratan rumah, na dohor sihol mantubuhkon tuah, na mandodoruh halani mangarou, sonai do hanami halani Ham, ale Jahowa. [234]

¹⁸Boratan rumah do hanami, mangarou do hanami, doskon na mantubuhkon logou do hanami. Haluahon seng tarparoh hanami bani nagori in, anjaha seng dong tubuh siiankon tanoh on. [235]

¹⁹ Manggoluh do use na matei-Mu, puho do use bangkei ni sidea. Puho ma anjaha marolob-olob ma, nasiam na marianan ibagas orbuk. Ai namur haliharon do namur-Mu, anjaha padaraton ni tanoh in do use na matei. [236]

²⁰Roh ma, ale bangsangku, masuki ma kamarmu, tutup ma labah i pudimu, ponopkon ma dirimu tongkin paima lopus ringis in. [237]

²¹Ai tonggor ma, luar do Jahowa humbani ianan-Ni, laho manluluhon salah ni halak na mangiankon tanoh on, anjaha patidakkon ni tanoh in ma daroh na madurus bani, anjaha seng rungkubonni na matei tarbunuh i atas ni. [238]