Read Batak Simalungun JESAYA 28 Bible Online

JESAYA 28 - Batak Simalungun bible

JESAYA 28

¹Bursik ma sortali hajengeson ni halak na mabuk i Efraim, ampa hameluson ni bunga ni hasangaponni na jagar ai, ai ma na bani ulu ni pamah na lambutan, ianan ni halak na mabuk binahen ni anggur. [246]

²Tonggor ma, dong do sada na margogoh ampa na markuasa bani Tuhan; songon udan na marambolas do ai, songon halisungsung na mansedahon, songon udan na manalosou, bah na marbanggal, na manimpalhon hu tanoh gogoh-gogoh. [247]

³Marhitei nahei do lotlotanni sortali hagijangon ni halak na mabuk i Efraim,

⁴ampa hameluson ni bunga ni hasangaponni na jagar ai, ai ma na bani ulu ni pamah na lambutan, songon buah ni hayu ara na parlobei mabei paima musim milas; anggo adong na mangidah ai, mintor ibondut do daskonsi i tanganni.

⁵Bani ari ai Jahowa Zebaot ma gabe sortali hamuliaon ampa rudang hajengeson bani na tading humbani bangsa-Ni,

⁶ampa tonduy habonaron bani halak sidabuh uhum, ampa gogoh bani halak na mangusir munsuh hun horbangan.

⁷Age halak on, rebad-rebad do ibahen anggur, anjaha mirdong ibahen siinumon na koras; malim ampa nabi rebad-rebad do ibahen siinumon na koras, mabuk ibahen anggur; minggot do sidea halani siinumon na koras, kahou sidea ibagas na manjahai, anjaha mugar-ugar uhurni mandabuh uhum.

⁸Tongon, ganup do meja gok ibahen utah-utah ni sidea, seng dong ianan na so butak.

⁹Nini sidea, “Bani ise do sihol ajarhononni habotohon, anjaha bani ise do sihol patorangonni pangungkabon? Bani na baru sirang minum nani, bani na baru ganggang humbani tadahni?

¹⁰Lalab titah, lalab aturan, lalab titah, lalab aturan, ijon otik, ijai otik.”

¹¹Tongon, marhitei halak parsahap na so niarusan ampa parhata na legan do Naibata sihol marsahap bani bangsa on: [248]

¹²Ia na dob mangkatahon bani sidea, “On do parsaranan, palopas marsaran na loja in, anjaha on do ianan hasonangan.” Tapi seng itangihon sidea. [249]

¹³Jadi mangonai ma bani sidea hata ni Jahowa -- lalab titah, lalab aturan, lalab titah, lalab aturan, ijon otik, ijai otik -- gabe tinggalak ma sidea sanggah mardalan, maripuk hona jarot anjaha tartangkap. [250]

¹⁴Halani ai tangar hanima ma hata ni Jahowa, ale halak sipanrehei, na marrajai bangsa on, na marianan i Jerusalem.

¹⁵Ai ihatahon hanima do, “Domma marpadan hanami pakon hamatean, anjaha domma manriah hanami pakon nagori toruh, paboa anggo roh bah marbanggal, seng anjai das ai bennami; ai domma ibahen hanami haporusannami ladung, anjaha pangoto-otoion ibahen hanami parlingodannami.

¹⁶Halani ai sonon do hata ni Tuhan Jahowa, ʻTonggor ma, Hupatibal do i Sion sada batu onjolan, sada batu na dob niuji, sada batu parsuhi na maharga, bahen onjolan na totap. Barang ise na porsaya Bani, seng anjai tarbador.ʼ [251]

¹⁷Anjaha bahenon-Ku do habonaron gabe bonang arang, anjaha hapintoron gabe tali dondon; anjaha ayubkonon ni udan ambolas do haporusan ladung anjaha bah marbanggal do mambaorhon parlingodan,

¹⁸anjaha masabkononkon do padannima pakon hamatean anjaha seng asi be panriahannima pakon nagori toruh; anggo roh bah marbanggal ai, ropukonni do hanima.

¹⁹Barang piga hali pe ia roh, luahononni do hanima; tongon, siap sogod do ai roh, arian pakon borngin. Anjaha pitah songgot-songgot do mambahen naarusi pangungkabon. [252]

²⁰Ai mapondoktu do podoman sihol tibal mangintordang ijai, anjaha sabing hurang bolag parsabingon.

²¹Ai jongjongkonon ni Jahowa ma songon na bani Dolog Perasim, anjaha gajag ma ringis-Ni songon na i pamah Gibeon, laho pasaudkon horja-Ni, tapi ganjil do horja-Ni -- laho mandobkon lahoan-Ni -- legan humbani na somal do lahoan-Ni! [253]

²²Ai pe, ulang nunut pahiri-hirihon, ase ulang roh poltikni panangkutnima, ai domma hubogei hasedaon humbani Jahowa Zebaot, na dob pinutuskon-Ni bani sab tanoh on.” [254]

²³Paeleng pinggolmu, tangar sorangku, bogei anjaha tangar ma hatangku!

²⁴Ai ganup ari do paninggala maninggala laho martidah? Ai torus do inunut manangkul pakon manisir tanohni?

²⁵Ai lang sonon do? Dob ipados tanoh ai, ai lang isaburhon ma longa, itidahkon juragi, marbaris isuan gandum, anjaha inahkon jagul bani iananni, anjaha andolei songon balogni ibahen?

²⁶Sonai do ia ipodahi sintong-sintong, Naibatani do mangajarisi.

²⁷Tongon, seng marhitei gareta pardogei idogei halak longa, seng galapang ni gareta ibahen halak mardogei juragi, tapi marhitei tungkot do idogei longa, anjaha juragi marhitei bogbog-bogbog.

²⁸Ai iropuki halak do gandum? Lang, seng paturutonni lotlotan ai lalab. Anggo ipadalan galapang ni garetani ampa hudani hunjai, seng iropuk ai.

²⁹Age ai marharorohan humbani Jahowa Zebaot do, halongangan do sura-sura-Ni, anjaha timbul do hapentaran-Ni. [255]