Read Batak Simalungun JESAYA 29 Bible Online

JESAYA 29 - Batak Simalungun bible

JESAYA 29

¹Bursik ma ho, ale Ariel, ale Ariel, ianan parsaranan bani si Daud hinan. Tambah-tambahi hanima ma tahun pesta in, sai marpestai ma hanima! [256]

²Tapi parohon-Ku do hasosakan bani Ariel, gabe masa ma doruh-doruh ampa partangison; gabe doskon Ariel ma ai Bangku.

³Anjaha hubuon-Ku ma ho inggot, sosakon-Ku ho marhitei hubuan, anjaha bahenon-Ku do na mangimbang ho. [257]

⁴Jadi unduk ma ho hun tanoh marsahap, anjaha humbagas orbuk do tarbogei hatamu; soramu songon sora ni begu-begu humbagas tanoh, anjaha humbagas orbuk do sahapmu marhusip-husip bogeion.

⁵Tapi munsuhmu na buei ai gabe songon orbuk na lumat ma ai, anjaha songon lapa-lapa na habang ma sipangodoh-odoh na buei ai. Anjaha sompong, na so panagamon do ai masa. [258]

⁶Jahowa Zebaot do na roh marlulu marhitei longgur pakon lalou ampa sora na banggal, marhitei halisungsung pakon haba-haba ampa gara ni apuy na mangankon. [259]

⁷Gabe songon nipi, songon panonggoran borngin ma bangsa-bangsa na buei ai, na marporang dompak Ariel, haganup na marporang dompaksi ampa dompak batar-batarni anjaha na manosaksi.

⁸Songon halak na loheian, na marnipi ia mangan, hape dob puho seng sombuh loheini iahap, barang songon halak na horahan, na marnipi ia minum, hape dob puho, loja ia anjaha horahni seng miloh: Sonai do bala ni bangsa ai, na marporang dompak Dolog Sion. [260]

⁹Jonong ma hanima anjaha longang, ulang ma hanima marpangidah, pitung ma! Mabuk ma hanima, tapi sedo binahen ni anggur, rebad-rebad ma hanima, tapi sedo halani siinumon na koras!

¹⁰Ai domma iuseihon Jahowa bannima tonduy na pasinok modom, anjaha itutup matanima, ai ma nabi-nabi ai, anjaha irungkub do ulunima, ai ma halak na marpanonggoran ai. [261]

¹¹Anjaha ganup pangungkabon ai, gabe songon hata ni buku na nilak do ai bannima, na binere bani sada halak na mambotoh mambasa, nini, “Basa on! Jadi ibalosi, ʻSeng tarbahen ahu, ai ilak do in.ʼ

¹²Atap anggo ibere buku ai bani halak na so mambotoh mambasa, nini, ʻBasa on!ʼ Jadi ibalosi, ʻSeng hubotoh mambasa surat.ʼ

¹³Jadi ihatahon Tuhan ma, ʻHalani ipadohor bangsa on dirini marhitei pamanganni anjaha ipasangap sidea Ahu marhitei bibirni, hape uhurni ganggang do hun Bangku, anjaha biar ni sidea Bangku, domu bani titah-titah ni jolma, na ginuruhon do hansa, [262]

¹⁴halani ai, tonggor ma, halongangan do use bahenon-Ku dompak bangsa on, halongangan botul-botul; jadi magou ma hapentaran ni na pentar-pentarni, anjaha masab hauhuron ni paruhur ni sidea. [263]

¹⁵Bursik ma halak, na mamonopkon sura-surani bagas i lobei ni Jahowa, anjaha na mangkorjahon horjani ibagas hagolapan, na mangkatahon, ʻIse mangidah hanami? Ise mananda hanami?ʼ [264]

¹⁶Ee hanima sipasuhar haganup! Ai doskon sitopa hudon do tanoh liat ai? Atap hatahonon ni jadi-jadian ma dompak na manjadihonsi: Seng ia manjadihon ahu; atap hatahonon ni na ginana ma dompak na mangganasi: Seng dong hapandeianni?” [265]

¹⁷Ai lang tongkin nari mando ase mubah Libanon gabe juma na lambutan, anjaha juma na lambutan hiraon gabe harangan? [266]

¹⁸Bani ari ai, bogeion ni halak na nengel ma hata na tarsurat, anjaha marpangidah ma mata ni halak na mapitung humbani na golap anjaha na lotir. [267]

¹⁹Anjaha martambah ma malas ni uhur ni halak na martoruh uhur ibagas Jahowa, anjaha halak na masombuh i tongah-tongah ni jolma marolob-olob do marhitei Na Pansing ni Israel.

²⁰Ai bois ma halak sipangodoh-odoh, magou halak sipanrehei ampa haganup na pasura-sura hajahaton,

²¹ai ma na papeol uhum i paruhuman, ampa na manidingi halak sidabuh uhum i horbangan, anjaha na mandabuhkon halak parpintor marhitei hasaksian ladung. [268]

²²Halani ai sonon do hata ni Jahowa, na paluahkon si Abraham, pasal ginompar ni Jakob, “Seng anjai tarbador be Jakob, seng anjai marposi be bohini.

²³Ai anggo ididah sidea jadi-jadian ni tangan-Ku i tongah-tongah ni sidea, papansingon ni sidea ma goran-Ku, papansingon ni sidea ma pakon Na Pansing ni Jakob anjaha habiaran ni sidea Naibata ni Israel.

²⁴Anjaha halak na kahou ibagas partonduyon dapotan uhur pangarusion anjaha siparungut-ungut ra manjalo podah.”