Read Batak Simalungun JESAYA 3 Bible Online

JESAYA 3 - Batak Simalungun bible

JESAYA 3

¹Tonggor ma, paosoron ni Tuhan Jahowa Zebaot ma hun Jerusalem pakon hun Juda panungkoli ampa tungkot, parbohalan ni ruti pakon parbohalan ni bah ganup, [38]

²puanglima pakon dalahi si parmunsuh, panguhum pakon nabi-nabi, si partondung pakon partua-partua,

³kopala ni silima-puluh halak, na sangap-sangap pakon panuturi, parsibalik mata na pandei ampa si partabas.

⁴Bahenon-Ku do dakdanak dalahi gabe raja bani sidea, dakdanak na inumon do na mamarentah sidea. [39]

⁵Jadi marsiodoh-odohan ma bangsa in, dalahi samah dalahi, hasoman samah hasoman; na maposo pahiri na matua, halak na malumat mandoruni halak na sangap.”

⁶Jadi jorotan ni halak ma saninani i rumah ni bapani, nini ma, “Dong ope mantelmu, ho ma pambobainami, ho ma na manggomgom reong-reong ni huta on.

⁷Jadi bani ari ai nini ma marbalos, ʻLang tarbahen ahu gabe panambari, seng dong ruti atap hiou i jabungku, ulang pabangkit nasiam ahu gabe pambobai ni bangsa in.ʼ

⁸Tongon, marumbak do Jerusalem anjaha Juda madabuh, halani dilah ni sidea ampa pambahenan ni sidea na mangimbang Jahowa, laho paboritkon panonggor-Ni na marmulia in.

⁹Rupa ni bohi ni sidea do patandahon sidea, anjaha dousa ni sidea pabotohkon sidea songon par Sodom, seng ihailahon. Magou ma sidea, ai sidea sandiri do parohkon na masambor bani. [40]

¹⁰Martuah do halak parpintor, sonang do ia; tongon, panganonni do buah ni na hinorjahonni. [41]

¹¹Magou do halak parjahat, sunsah do ia, ai balaskononkon do bani domu hubani na hinorjahon ni tanganni.

¹²Aih bangsang-Ku! Dakdanak do na mangodoh-odoh sidea, naboru parrajai bani. Aih bangsang-Ku! pambobaimu do na pakahouhon, anjaha sidea do na manggeori dalan sibolusonmu.”

¹³Hehe do Jahowa laho mamorang, jongjong do Ia laho manguhum bangsa-Ni.

¹⁴Roh do Jahowa laho mandabuh uhum, hubani pangintuai ni bangsa-Ni ampa raja-Ni. “Hanima, hanima do na mamondut pohon anggur in, ibagas rumahnima do barang rampasan humbani halak na masombuh. [42]

¹⁵Na mahua do hanima, ase idogei-dogei hanima bangsang-Ku, anjaha irojati hanima bohi ni halak na madoyuk? nini Tuhan Jahowa Zebaot.” [43]

¹⁶Nini Jahowa, “Halani margijang ni uhur boru Sion, ipadirgak-dirgak uluni mardalan, manerep-nerep pangkawahni, mairdit mardalan, anjaha mardiring-diring golang ni naheini ibahen, [44]

¹⁷jadi palpalon ni Tuhan ma ulu ni boru Sion, anjaha pasalangon ni Jahowa na niabitanni.

¹⁸Bani ari ai buaton ni Tuhan ma hajengeson ni tintin ni nahei, alit-alit ni bohi, horungkorung,

¹⁹subang, golang, tudung-tudung,

²⁰bulang, golang bani nahei, gondit, guri-guri ni minak na morum, pagar-pagar,

²¹tintin bani jari-jari, tintin bani igung,

²²pakeian na marujuan, baju ganjang, salendang, tas,

²³sormin, baju parbagas, tujung pakon sabing-sabing.

²⁴Jadi masa ma, gantih ni na morum na marbau, gantih ni gondit tali, gantih ni jambulan na kariting hapalpalon, gantih ni pakeian na majenges guni, gantih ni hajengeson habadoron.

²⁵Sagala anak dalahi bannima rasei do bahenon ni podang, anjaha puanglimanima matei i parmunsuhan.

²⁶Tangis anjaha marhoru ma horbanganni, lungunan, hundul-hundul ma ia bani tanoh.”