Read Batak Simalungun JESAYA 30 Bible Online

JESAYA 30 - Batak Simalungun bible

JESAYA 30

¹Bursik ma anak sipanlawan, nini Jahowa, na mambahen sada sura-sura, na so marharorohan hun Bangku, anjaha na mambahen parpadanan, na so marharorohan humbani tonduy-Hu, gabe martambah-tambah dousa ibahen, [269]

²na bingkat hu Masir lang palobei marpanungkun bani pamangan-Ku, laho marlingod bani pangondingi ni Parao, laho maporus bani linggom ni Masir. [270]

³Tapi gabe habadoron do bannima pangondingi ni Parao, anjaha parporusnima bani linggom ni Masir gabe hahirion.

⁴Age pe domma i Soan raja ni sidea, anjaha suruhanni das hu Hanes, [271]

⁵ganup do sidea maila marhalanihon ni bangsa na so marguna bani sidea, na so boi mambere pangurupion atap untung, tapi habadoron ampa hahirion do hansa.” [272]

⁶Pangungkabon Pasal Binatang na i Tanoh Dangsina: Mamontas tanoh na gok habiaran ampa hasosakan, tanoh harohan ni singa boru-boru ampa singa tunggal, ulog darih ampa naga na habang, itaruhkon sidea do artani i atas gurung ni halode ampa ugas-ugasni bani gurung ni unta hubani bangsa na so marguna bani sidea.

⁷Ai pangurupion ni Masir na lang do ai anjaha sisoya-soya, halani ai do ase hugoran ia: Binatang na soh-soh. [273]

⁸Ai pe, roh ma ho, uhirhon ma ai i lobei ni sidea bani sada lei, anjaha suratkon ma ai bani sada buku, ase gabe saksi ma ai bani panorang na roh ronsi sadokah ni dokahni. [274]

⁹Ai bangsa sipanlawan do sidea, anak siparladung, anak na so ra manangihon pangajarion ni Jahowa,

¹⁰sidea na mangkatahon hubani siparalamat, “Ulang maralamat!” hubani nabi, “Ulang ijahai bennami pasal hasintongan, hatahon ma bennami na madear, jahai bennami na sininta ni uhurnami,

¹¹tadingkon dalan in, lembangi lapang in, ulang be pabogeihon bennami pasal Na Pansing ni Israel!”

¹²Halani ai sonon do nini Na Pansing ni Israel, “Halani mapas uhurnima bani hata on, anjaha martenger ni uhur bani pangodoh-odohon ampa haleklukon, anjaha mangunsandei hujai,

¹³halani ai mangonai ma bannima hajahaton on songon rigat na lambin marbolag bani tembok na gijang, na mulai lengleng hu darat, na sihol sompong tompas, ibagas na so panagamon;

¹⁴anjaha parbolahni usih songon parbolah ni hudon tanoh, na iropuki seng maralang-alang, gabe seng jumpah be topik-topik humbani sanga-sangani, ianan mambuat apuy hun tataring atap manahui bah hun bagas parigi.

¹⁵Ai sonon do hata ni Tuhan Jahowa, Na Pansing ni Israel, ʻMarhitei na mulak ampa na sip do maluah hanima, marhitei na soh pakon marhatengeran margogoh hanima.ʼ Tapi seng ra hanima, [275]

¹⁶nini hanima, ʻLang!ʼ Rahanan do hanami marhuda lintun, halani ai tongon, maporus ma hanima. Nini hanima ope, ʻHuda na doras do ajakonnami, halani ai tongon, doras do na mangayak-ayak hanima.ʼ [276]

¹⁷Saribu halak do hanima maporus halani pangondam ni sada halak; halani pangondam ni lima halak maporus do hanima ganupan, ronsi na tading humbennima ai, songon tiang mandera mando ai i atas dolog, songon alatan i raboyon.” [277]

¹⁸Halani ai paima-imahon do Jahowa, sihol do marulak-ulakan uhur-Ni dompak nasiam; halani ai bingkat do Ia laho mangidopi nasiam. Ai Jahowa, ai ma Naibata ni uhum, martuah ma ganup halak na martenger ni uhur Bani. [278]

¹⁹Tongon, ale bangsa na i Sion, na marianan i Jerusalem, seng lanjar tangis be nasiam. Maidop do uhur-Ni mangidah ham mambogei sora ni doruh-doruhmu. Anggo tartangar-Si ai, mintor balosan-Ni do ham. [279]

²⁰Age pe ibere Tuhan bani nasiam ruti hasosakan ampa bah hasunsahan, tapi seng be ponopkonon ni gurumu be dirini humbani nasiam, tapi idahon ni matamu ma gurumu tongtong. [280]

²¹Anjaha pinggolmu manangar hata hun pudimu, mangkatahon, “On ma dalan, dalani ma ai! Ulang manimbil hu siamun atap hu sambilou!” [281]

²²Jadi pabutakon nasiam ma ijai gana-gana nasiam na nilampis bani pirak, ampa gana-gana tuangan nasiam na nilampis bani omas. Sampakkonon nasiam ma ai songon ugas na mabutak, anjaha hatahonon nasiam ma, “Misir ma!” [282]

²³Anjaha bereon-Ni ma udan bani bonih na dob sinaburhonmu hu juma, ampa gandum, gogoh ni juma ai, dear ma anjaha buei. Bani ari ai manggagat ma pinahan nasiam bani sampalan na bolag. [283]

²⁴Lombu age halode na mangkorjahon tanoh, panganonni ma gagaton na dob ginaraman, na dob pinaborsih marhitei durung-durung ampa anduri.

²⁵Anjaha bani ganup dolog na gijang ampa buntu-buntu na banggal dong ma binanga ampa bah mardalan, bani ari pamunuhon bolon, sanggah na mangkarumbak manara-manara. [284]

²⁶Ambahni ai sondang ni bulan gabe songon sondang ni mata ni ari ma, anjaha sondang ni mata ni ari pitu hali lompit ma, songon haliharon ni pitu ari ma ai bani ari sanggah Jahowa mambaluti na maponggol humbani bangsa-Ni, anjaha manambari ugahni hinorhon ni hona bogbogan.

²⁷Tonggor ma, goran ni Jahowa roh humbani na daoh! Gajag do ringis-Ni, parah parjimbur-Ni; bibir-Ni gok do bani gila, anjaha dilah-Ni songon apuy na mangankon;

²⁸hosah-Ni songon bah na marbanggal, na sampur das hu borgok, laho mamiari bangsa sipajuh begu-begu marhitei anduri hamagouan, anjaha mannahkon kokang na pakahouhon bani osang ni bangsa-bangsa. [285]

²⁹Mandoding-doding ma nasiam, songon na marpesta na ma pansing sanggah borngin, anjaha marmalas ni uhur ma nasiam, songon halak na bingkat marhasoman tulila hu dolog ni Jahowa, hu dolog batu ni Israel. [286]

³⁰Anjaha pabogeihonon ni Jahowa ma sora-Ni na marmulia in, anjaha patidakon-Ni do tangan-Ni na tinampulhon-Ni ai marhasoman parah ni ringis-Ni ampa gara ni apuy na mangankon, marhitei haba-haba, udan na manalosou ampa sira-sira. [287]

³¹Gobir ma Assur halani sora ni Jahowa, sanggah na binogbogkon-Ni simambu-Ni bani sidea.

³²Anjaha ganup lonsing-lonsing uhum ai, na nilonsingkon ni Jahowa bani Assur, ipamasa do ai marhasoman sora ni tambur ampa husapi, anjaha marhitei tangan na mawas-awas do iporang sidea. [288]

³³Ai domma dokah hinan sirsir panutungan, bani raja ai pe ipasirsir do; bagas anjaha bolag do godung ai, gok tumang bani soban panutungi; hosah ni Jahowa, na mardalan songon hirtah na martimpul, ai do na pagarahon ai. [289]