Read Batak Simalungun JESAYA 31 Bible Online

JESAYA 31 - Batak Simalungun bible

JESAYA 31

¹Bursik ma halak, na tuad hu Masir mangindo pangurupion, na marpangajaman bani huda, anjaha na martenger ni uhur bani gareta porang halani bueini ai, pakon bani siajak huda halani gogohni ai; tapi na so mangkawah bani Na Pansing ni Israel, anjaha lang marpanungkun bani Jahowa. [290]

²Tapi Ia pe maruhur do, iparroh do hamagouan, seng mubah Ia humbani hata-Ni, tapi hehe do Ia mangimbang ginompar ni halak parjahat ampa sibere pangurupion bani halak sihorjahon hajahaton. [291]

³Jolma do halak Masir, sedo Naibata, daging do huda ni sidea, sedo tonduy. Anjaha pagostongon ni Jahowa do tangan-Ni, gabe jiris ma sipanolongi, anjaha targompang ma na tinolongan, anjaha rap do sidea magou. [292]

⁴Ai sonon do hata ni Jahowa bangku, “Songon singa atap anak ni singa maraum mandompakkon sisorohonni, anjaha age pe na pahumpul hulanan ni siparmahan manjumpahkonsi, seng tarsonggot mambogei surak-surak ni sidea, atap tunduk halani gosou ni sidea, sonai do Jahowa Zebaot susur bani Dolog Sion ampa bani buntu-buntuni laho marporang.

⁵Songon manuk-manuk na habang, sonai do Jahowa Zebaot laho manjagai Jerusalem, jagaon-Ni do ai anjaha paluahon-Ni, ramotkonon-Ni do ai anjaha pagoluhon-Ni. [293]

⁶Mulak ma nasiam hu Bani, ale anak ni Israel, na dob tinundalan nasiam ai parah-parah.

⁷Bani ari ai ganup ma mangambukkon gana-gana pirakni ampa gana-gana omasni, na pinauli ni tangan nasiam laho mambahen dousa. [294]

⁸Anjaha Assur madabuh ma ibahen podang, seng podang ni jolma; tongon, podang do mangankonsi, sedo podang ni manisia; maporus do ia halani podang, gabe halak siparrodi do anak ni sidea. [295]

⁹Jadi salpu ma batu ginggingni halani biar, anjaha ibagas gobir do pambobaini manadingkon mandera partandani, nini Jahowa simada apuy i Sion ampa simada pamurunan i Jerusalem.” [296]