Read Batak Simalungun JESAYA 32 Bible Online

JESAYA 32 - Batak Simalungun bible

JESAYA 32

¹Tonggor ma, ibagas hapintoron marrajai sada raja, anjaha pambobai romban hubani habonaron manggomgom. [297]

²Anjaha ganup sidea songon parlingodan humbani logou madoras do, songon panisioan humbani haba-haba, songon bah mardalan bani tanoh na horah, anjaha songon linggom ni dolog batu na banggal i tanoh dorging-dorging.

³Jadi seng be tutupon mata ni halak na marpangidah, anjaha tangi do pinggol ni halak na marpanangar.

⁴Uhur na urahtu mambahen haputusan gabe marpartimbangan do, anjaha dilah ni halak na bebet, pandei anjaha torang marsahap. [298]

⁵Halak na bodoh, seng be igoran halak na sangap, anjaha halak sipangoto-otoi, seng be igoran halak na marmulia.

⁶Tongon, haotoon do isahapkon halak na oto, anjaha uhurni manguhuri hajahaton, laho mangkorjahon hasamboron, laho mansahapkon na lepak pasal Jahowa, laho paturutkon holtei-holteian halak na loheian anjaha laho mambuat siinumon humbani na horahan.

⁷Hajahaton do akal-akal ni siparakal-akal, sai marranggi-ranggi do ia laho mangagou halak na madoyuk marhitei hata ladung, age pe hata sintong ihatahon halak na masombuh. [299]

⁸Tapi halak paruhur na pitah, hapitahon do ipingkiri, anjaha totap do ia marsijoloman bani na pitah.

⁹Jongjong ma hanima, ale parinangon na marsonang-sonang, tangar hanima ma hatangku, ale anak boru sipangenjeng, tangihon hanima ma sahapku! [300]

¹⁰Tar satahun nari hitir-hitir ma hanima ale sipangenjeng, ai salpu ma pambuatan anggur, pariama buah ni hayu seng dong be.

¹¹Hitir ma, ale parinangon na marsonang-sonang, gobir ma ale anak boru sipangenjeng! Tanggali ma pakeiannima, gabe talanjang ma, gonditi ma binongeinima bani guni!

¹²Marsitompuk tontonni bei ma hanima, halani juma na dear-dear, halani hayu anggur na ramos,

¹³halani tanoh ni bangsangku, na mantubuhkon hupi-hupi ampa suga-suga, tongon, halani haganup rumah parmegah-megahan na i huta na mariah in.

¹⁴Ai tadingkononkon do istana-istana, mangadi hariahon ni huta, buntu-buntu ampa manara panjagaan, gabe liang ma lalab, gabe malas ni uhur bani halode liar, sampalan bani pinahan,

¹⁵paima iuseihon banta Tonduy na hun datas, gabe tanoh na lambutan halimisan anjaha tanoh na lambutan gabe doskon tombak. [301]

¹⁶Marianan ma habonaron i halimisan, anjaha hapintoron marianan bani tanoh na lambutan.

¹⁷Buah ni hapintoron ai ma damei, anjaha pangkorhon ni habonaron ai ma hasonangan ampa haatokon ronsi sadokah ni dokahni.

¹⁸Jadi marianan ma bangsangku bani ianan hadameion, bani ianan na sonang, ampa ianan parsaranan na minop. [302]

¹⁹Anjaha bois do rumbakkononkon harangan ai, anjaha nepnep tumang do huta ai bahenon.

²⁰Martuah ma nasiam na boi martidah i lambung ni bah mardalan, anjaha na boi palopaskon mardalani lombu ampa halode.