Read Batak Simalungun JESAYA 33 Bible Online

JESAYA 33 - Batak Simalungun bible

JESAYA 33

¹Bursik ma, ho na parsedahon, tapi na so pinarseda ope, ampa ho siparrampas, na so hona rampas ope. Anggo salpu ma ho mansedahon, parsedaon ma ho, dob salpu ho manrampas, rampason ma ho. [303]

²Ham Jahowa, maidop ma uhur-Mu bennami, Ham do iarapkon hanami. Sai Ham ma tangan na mangurupi hanami siap sogod, ampa pangurupi bennami bani panorang hasosakan.

³Halani sora ni hagosouon maporus do bangsa-bangsa, halani parroh-Mu mandorab mambur merap do bangsa sipajuh begu-begu, [304]

⁴anjaha patumpuon do taban-taban, songon pambuati ni balang, songon parurup ni tamponok, sonai do iurup ai. [305]

⁵Timbul do Jahowa, ai i babou do Ia marianan, igoki do Sion bani habonaron ampa hapintoron.

⁶Sogop ma hubani panorang na sonang, haluahon na marlobih-lobih, hapentaran ampa habotohon, biar bani Jahowa do arta bani Sion.

⁷Tonggor ma, doruh-doruh do i darat halak na i Ariel, suruhan na padameihon tangis sosombopon. [306]

⁸Halong do pasar, maronti pardalanan. Hona osei parpadanan, seng iparduli huta-huta, seng harga jolma. [307]

⁹Horu anjaha melus do tanoh in, maila do Libanon anjaha mangeruti, Saron gabe doskon halimisan, anjaha Basan ampa Karmel mangkatangtang bulungni.

¹⁰Sonari, jongjong ma Ahu, nini Jahowa, sonari, hehe ma Ahu, sonari, bingkat ma Ahu.

¹¹Marhitei anggala do hanima boratan rumah, panabian do itubuhkon hanima, apuy do hosahnima na sihol mangankon hanima.

¹²Anjaha tutungon do bangsa-bangsa gabe hapur, anjaha songon suga-suga na niroboh, ipuruni sidea ibagas apuy. [308]

¹³Tangar ma, hanima na daoh, pasal na Hubahen, anjaha hanima na dohor, tanda hanima ma gogoh-Ku.

¹⁴Mabiar do pardousa i Sion, hagobiron do mandorab halak sipakulah-kulah, nini, “Ise hun banta na boi marianan bani apuy na mamboiskon? Ise hun banta na boi marianan bani gara ni apuy sisadokah ni dokahni?” [309]

¹⁵Ai ma halak na mardalan ibagas hapintoron, na sintong-sintong marsahap, na mangkagigihon laba halani odoh-odoh, na manjaga tanganni, ase ulang ijalo sisip, na mamitut pinggolni ase ulang ibogei pasal na manduruskon daroh, na papitpit matani, ase ulang mangidah na masambor, [310]

¹⁶ai do na marianan bani na gijang, ianan partahanan bani; ai ma dolog batu, sai bereon do ruti bani, anjaha bah inumonni totap do dong.

¹⁷Matamu do mangidah Raja in ibagas hajengeson-Ni, anjaha tatapon ni sidea do sada tanoh na lumbang. [311]

¹⁸Dingaton ni uhurmu do hasonggotan ai, nim ma, “Ija do sipangkira ondi, ija do sijalo sohei ondi? Ija do sihira manara ondi?”

¹⁹Seng anjai idahonmu be bangsa na jungkat ai, bangsa siparsahap na ganjil, na so boi arusanmu, na bebet marsahap, na so boi artihononmu. [312]

²⁰Kawahkon ma Sion, huta pesta partumpu-tumpuan banta. Matamu sandiri do na mangidah Jerusalem, ai ma ianan na sonang, sada lampolampo na so meser-eser, pasuk-pasukni pe seng siumpaton ronsi sadokah ni dokahni, anjaha ganup parrahutini seng anjai rotaponkon. [313]

²¹Tongon, Jahowa na marmulia in do hasomanta ijai, dong do ijai binanga ampa bah na bolag, seng montas ijai parau silugaan, anjaha kapal na banggal seng mandipar hunjai.

²²Tongon, Jahowa do panguhum banta, Jahowa do sibere titah banta, Jahowa do Rajanta, Ia do na paluahkon hita.

²³Hondur do tali-Ni, seng be ijolomi tiang layar-Ni, seng boi be herbang ibahen layar-Ni. Jadi bagion ma buei taban-taban, gari halak na repat dapotan taban-taban.

²⁴ Anjaha sada pe lang pangisini mangkatahon, “Boratan do ahu!” Bangsa na marianan ijai dapotan hasasapan ni dousa. [314]