Read Batak Simalungun JESAYA 35 Bible Online

JESAYA 35 - Batak Simalungun bible

JESAYA 35

¹Marmalas ni uhur ma halimisan pakon tanoh dorging-dorging, marolob-olob ma tanoh na lungun anjaha marbunga. Songon silundat ma ai marbunga, anjaha marolob-olob; tongon, marsurak-surak anjaha marolob-olob. [325]

²Hamuliaon ni Libanon ibere do bani, sonai hajagaron ni Karmel ampa Saron. Idahon ni sidea do hamuliaon ni Jahowa, hajombuton ni Naibatanta.

³Pargogohi nasiam ma tangan na galek, patotap towod na rebad-rebad! [326]

⁴Hatahon nasiam ma bani paruhur na galek, “Tenger ma uhur nasiam, ulang mabiar! Tonggor ma Naibata nasiam, roh do Ia mambalas ampa marlulu; Ia sandiri do na roh, laho paluahkon nasiam.” [327]

⁵ Bukaon ma ijai mata ni halak na mapitung, anjaha ungkabon pinggol ni halak na nengel; [328]

⁶manlumpat-lumpat do ijai halak na repat songon ursa, anjaha marsurak-surak dilah ni halak na longah; anjaha pultak do bah i halimisan, sonai age binanga i tanoh dorging-dorging. [329]

⁷Gabe tao do horsik na marohop-ohop, anjaha martubuhan bah i tanoh na horah; ianan ni sorigala hinan gabe hatubuhan ni tolong ampa arung-arung. [330]

⁸ Anjaha dong do ijai dalan na bolon, anjaha igoran do ai dalan na ma pansing; seng montas hunjai halak na mabutak, tapi bangsani na mandalani dalan ai do simada ai; halak na oto pe seng kahou ijai. [331]

⁹Seng dong singa ijai, anjaha binatang panoroh seng montas hunjai, seng dong jumpah ai ijai; tapi halak na pinaluah do mardalan ijai.

¹⁰ Anjaha mulak ma halak na tinobus ni Jahowa, roh hu Sion mandoding-doding, malas ni uhur sisadokah ni dokahni do i atas uluni. Jaloon ni sidea do hamegahon ampa malas ni uhur, tapi maporus ma pusok ni uhur ampa hoih-hoih. [332]