Read Batak Simalungun JESAYA 37 Bible Online

JESAYA 37 - Batak Simalungun bible

JESAYA 37

¹Jadi dob ibogei Raja Hiskia hata ai, irigati ma hiouni, isorungkon ma hiou guni, dob ai laho ma ia hu rumah ni Jahowa. [340]

²Dob ai isuruh ma si Eliakim, sijaga rumah bolon, pakon si Sebna, jurutulis ai rap pakon malim situanan, marhiou guni marayak Nabi Jesaya, anak ni si Amos.

³Nini sidea ma hu bani, “Sonon do hata ni si Hiskia, ʻAri hasosakan, paminsangon ampa habadoron do ari on. Jumpah ma namin panorangni tubuh na etek-etek, tapi seng dong gogoh laho manubuhkon.ʼ

⁴Ra ibogei Jahowa Naibatamu do hata ni Rabsake, na sinuruh ni tuanni Raja Assur, laho pahirihon Naibata na manggoluh in, ase ibalaskon hata ai, na dob binogei ni Jahowa Naibatamu; antong martonggo ma ham mangapiti simasima na tading in ope.”

⁵Jadi dob das juakjuak ni Raja Hiskia bani si Jesaya,

⁶nini si Jesaya ma bani sidea, “Sonon ma hatahon nasiam bani tuan nasiam: Sonon do hata ni Jahowa, ʻUlang ho mabiar pasal hata na dob binogeimu, na dob niapaskon ni juakjuak ni Raja Assur hu Bangku.ʼ

⁷Tonggor ma, Ahu ma mamberehon bani sada tonduy, ase ibogei barita, gabe mulak hu tanohni, ase Ahu mambahen rasei ia marhitei podang i tanohni sandiri.”

⁸Mulak ma Rabsake ai, anjaha jumpahsi ma Raja Assur marmunsuh pakon Libna; ai domma ibogei hinan na dob misir raja ai hun Lakis.

⁹Anjaha dob ibogei si Sanherib pasal si Tirhaka, raja ni Etiopia, “Tonggor ma, domma bingkat ia laho marmunsuh dompak ham, isuruh ma use suruhanni bani si Hiskia, mangkatahon,

¹⁰ʻSonon ma hatahon nasiam bani si Hiskia, raja ni Juda: Ulang ma ra ho paoto-otoon ni Naibatamu, na pinangunsagahkonmin, na mangkatahon: Seng ondoskononkon Jerusalem hubagas tangan ni Raja Assur.ʼ

¹¹Tonggor ma, domma ibogei ho na binahen ni Raja Assur hu bani ganup nagori laho marraseihon sidea. Mintor tumaram ma maluah ia ho?

¹²Tarpaluah naibata ni bangsa-bangsa ai do sidea, ai ma bangsa-bangsa na siniapkon ni ompungku: Gosan, Haran, Resep ampa halak na i Eden, na marianan i Telasar? [341]

¹³Ija do raja ni Hamat, raja ni Arpad, raja hun huta Separwaim, Hena pakon Iwa?”

¹⁴Jadi ijalo si Hiskia ma surat ai hun tangan ni suruhan ai, anjaha ibasa ma ai, dob ai tangkog ma ia hu rumah ni Jahowa anjaha ipaherbang si Hiskia ma surat ai i lobei ni Jahowa,

¹⁵anjaha martonggo ma si Hiskia hubani Jahowa, nini ma,

¹⁶“Ham Jahowa Zebaot, Naibata ni Israel, na marparatas bani herubim! Sahalak Ham do Naibata ni haganup harajaon na i tanoh on! Ham do na manompa langit pakon tanoh on.

¹⁷Paeleng Ham ma pinggol-Mu, ale Jahowa, anjaha tangar ma! Ungkab Ham ma panonggor-Mu anjaha tonggor ma! Tangar Ham ma haganup hata ni si Sanherib, na tinonahkonni laho pahiri Naibata na manggoluh in.

¹⁸Tongon do, ale Jahowa, domma iboiskon raja ni Assur haganup bangsa-bangsa ampa nagori ni sidea.

¹⁹Anjaha domma igijigkon hubagas apuy naibata ni sidea ai, ai seng tongon Naibata ai, tapi jadi-jadian ni tangan ni jolma do, hayu pakon batu, halani ai do ase iparseda sidea ai.

²⁰On pe, Ham Jahowa, Naibatanami, paluah Ham ma hanami humbani tanganni, ase itanda haganup harajaon na i tanoh on, paboa Ham do Jahowa, Ham tumang.” [342]

²¹Dob ai isuruh si Jesaya, anak ni si Amos ma na mangkatahon bani si Hiskia sonon, “Sonon do hata ni Jahowa Naibata ni Israel, ʻDomma Hutangihon tonggomu na hu Bangku pasal si Sanherib, raja ni Assur.ʼ

²²On do hata na hinatahon ni Jahowa pasalsi, ʻPis do uhurni mangidah ho, iapasi anak boru, boru Sion do ho, iupir-upirhon boru Jerusalem do uluni i pudimu.ʼ

²³Ise do na nirehean pakon na niapasanmin? Dompak ise do na pinamalingmin soramu, anjaha ipatingkal ho matamu? Dompak Na Pansing ni Israel do.

²⁴Marhitei juakjuakmu iapasi ho do Jahowa, anjaha ihatahon ho, ʻRap pakon garetangku na buei in naik do ahu hu atas ni dolog, daoh das hu Libanon; huroboh do hayu aresni sigijangan ampa marantini sidearan; das do ahu bani pakpakni si atasan ampa hubagas haranganni sipotpotan.ʼ [343]

²⁵Huhurak do parigi anjaha huinum do bah na legan; anjaha huarsik do marhitei tapak-tapak ni naheihu ganup bah i Masir.

²⁶Seng ope ibogei ho? Na dob Hutotapkon hinan, anjaha na dob Huranggihon humbani na basaia, ai ma na Hupamasa sonari, ase isiapkon ho huta na toguh gabe timbunan batu,

²⁷anjaha pangisini ai, na so margogoh ai, gabe tarsonggot anjaha gaor, anjaha gabe songon suan-suanan na i ladang, anjaha gabe songon poyon-poyon na galek, songon poyon-poyon na i atas tayub anjaha songon gandum na hahorahan.

²⁸Tapi Hubotoh do parjongjongmu pakon parhundulmu, pardaratmu pakon parmasukmu, ampa pangoga-ogamu Bangku.

²⁹Halani mangoga ho dompak Ahu anjaha das bani pinggol-Hu hajungkatonmu, bahenon-Ku ma halihir bani igungmu pakon rantei bani bibirmu, anjaha paulakon-Ku do ho humbani dalan harohanmu. [344]

³⁰On ma tanda bam, ale Hiskia, ʻPanganonmu ma omei sagak tahun on pakon bani tahun paduahon; patolu-tahunkon martidah ma hanima anjaha marpariama, manuan hayu anggur anjaha mangankon buahni.ʼ

³¹Anjaha simasima na maluah humbani ginompar ni Juda, marurat ma use hu toruh anjaha marbuah hu atas. [345]

³²Ai hun Jerusalem do luar sada simasima, anjaha hun Dolog Sion sada hulanan na pinaluah. Ringis ni Jahowa Zebaot do sibahen in.

³³Halani ai sonon do hata ni Jahowa pasal raja ni Assur, ʻSeng anjai masuk ia hubagas huta on, atap siorhononkon sada lingkit hujon, barang roh ia hu lobei ni huta on margantar atap bahenonni hubuan inggot huta on.ʼ

³⁴Maningon humbani dalan harohanni ai ia mulak, tapi seng anjai masuk ia hubagas huta on, nini Jahowa.

³⁵Ai sihol ondingan-Ku do huta on laho paluahkonsi, halani Ahu sandiri pakon halani juakjuak-Ku si Daud.”

³⁶Jadi luar ma malekat ni Jahowa, gabe ibunuh ma i parsaranan ni halak Assur saratus ualuh puluh lima ribu halak. Jadi dob puho sidea girah patarni ai, tonggor ma, domma gabe bangkei ganup. [346]

³⁷Dob ai bingkat ma si Sanherib, raja ni Assur mulak hu hutani, anjaha marianan ma ia i Ninive.

³⁸Jadi sanggah na manumbah ia i rumah ni Nisrok, naibatani ai, ibunuh anakni si Adramelek pakon si Sareser ma ia marhitei podang; dob ai maporus ma sidea hu tanoh Ararat, anjaha si Asar-Hadon, anakni ai ma bangkit raja manggantihsi.