Read Batak Simalungun JESAYA 39 Bible Online

JESAYA 39 - Batak Simalungun bible

JESAYA 39

¹Bani panorang ai isuruh si Merodak-Baladan, anak ni si Baladan, raja ni Babel ma suruhanni mamboan surat pakon siluah bani si Hiskia, halani ibogei boritan ia anjaha jorgit use.

²Jadi malas ma uhur ni si Hiskia mangidah sidea, gabe ipatuduhkon ma bani sidea rumah parartaanni, pirak, omas, morum-moruman, minak na misbou, rumah parsinjataanni pakon haganup na dong bani i rumah parartaanni. Seng dong na ibagas rumahni ampa na bani sab gomgomanni na so ipatuduhkon si Hiskia bani sidea.

³Dob ai roh ma Nabi Jesaya marayak Raja Hiskia, nini ma dompaksi, “Aha do hinatahon ni halak in, anjaha hunja do sidea na roh in marayak ham? Nini si Hiskia ma, ʻHun nagori na daoh do sidea na roh in marayak ahu, hun Babel.ʼ

⁴Nini ma, ʻAha do na nididah ni sidea i rumahmu?ʼ Nini si Hiskia ma, ʻididah sidea do ganup na ibagas rumahku, seng dong na ibagas rumah parartaanku na so hupatuduhkon bani sidea.ʼ

⁵Dob ai nini si Jesaya ma dompak si Hiskia, ʻTangihon ma hata ni Jahowa Zebaot.ʼ

⁶Tonggor ma, na roh ma panorangni, tarboan ma ijai hu Babel sagala na i rumahmu ampa sagala na pinahumpul ni ompungmu ronsi sadari on, seng dong na teba, nini Jahowa.

⁷Anjaha deba humbani anakmu na tubuh bamu, boanonni do, gabe siparugas i rumah ni Raja Babel.

⁸Jadi nini si Hiskia ma dompak si Jesaya, ʻDear do hata ni Jahowa na niluarhonmu ai.ʼ Ai nini ibagas uhurni, ʻAsal ma sonang anjaha mardamei sadokah goluhku!ʼ ”