Read Batak Simalungun JESAYA 42 Bible Online

JESAYA 42 - Batak Simalungun bible

JESAYA 42

¹ Tonggor ma, juakjuak-Ku, na Hutogu in, na Hupilih in, na hinarosuhkon ni Tonduy-Hu. Domma Hupasorap Tonduy-Hu hu Bani, patandahonon-Ni do habonaron hubani sipajuh begu-begu. [384]

²Seng marsurak-surak Ia barang maling sora-Ni ibahen, anjaha seng ipabogeihon sora-Ni i dalan-dalan. [385]

³ Arung-arung na dob marosak, seng lanjar ponggolhonon-Ni, anjaha sumbu na mirlop-irlop, seng lanjar intopan-Ni; domu hubani hasintongan do dalankonon-Ni uhum. [386]

⁴Seng anjai miloh ia anjaha seng anjai marosak ia, paima ipajongjong hasintongan i tanoh on anjaha pulou-pulou masihol bani titahni.

⁵Sonon do hata ni Naibata Jahowa, Sitompa langit anjaha na paherbangkonsi, na pajonamkon tanoh on ampa sagala na tubuh hunjai, na mambere hosah bani halak na marianan ijai ampa tonduy bani jolma na mardalan ijai,

⁶“Ahu do Jahowa, na mandilo ho ibagas hapintoron anjaha na manogu tanganmu. Ahu do na parorot ho anjaha Ahu do na pabangkit ho gabe parpadanan bani bangsa in, gabe panondang bani bangsa parbegu, [387]

⁷laho mambuha mata ni na mapitung, laho padaratkon na tarsangkut ibagas tutupan, humbagas rumah tahanan halak na marianan ibagas na golap. [388]

⁸Ahu do Jahowa, ai ma goran-Ku, anjaha hasangapon-Ku, seng bereon-Ku bani na legan, sonai hamuliaon-Ku bani gana-gana. [389]

⁹Na dob hinatahon hinan domma saud, anjaha na baru Hupatugah ma sonari; paima martumbor ai, pabogeihonon-Ku ma ai bannima.” [390]

¹⁰Dodingkon nasiam ma bani Jahowa sada doding na baru, hamuliaon-Ni bani ujung ni tanoh on, nasiam na marlayar i laut ampa ganup na mangingani ai, nasiam pulou-pulou ampa na marianan ijai. [391]

¹¹Sai ipamaling halimisan ma sorani ampa na montas ijai, dusun-dusun, na niiankon ni halak Kedar; sai marolob-olob ma halak na marianan bani dolog batu, marsurak-surak ma sidea hun pakpak ni dolog.

¹²Ibere sidea ma hasangapon bani Jahowa, anjaha ibaritahon ma hamuliaon-Ni bani pulou-pulou.

¹³Bingkat do Jahowa songon puanglima, songon halak siparmunsuh gajag ringis-Ni; ipamaling sora-Ni, marsurak porang do Ia, anjaha ipataridahkon hapuanglimaon-Ni bani munsuh-Ni.

¹⁴Hupasip do humbani nahinan, sai soh do Ahu, hutahan diri-Ku, tapi sonari mandodoruh do Ahu songon puang-puang na mangarou, hosah-kosah do Ahu mangalop hosah.

¹⁵Seda do bahenon-Ku dolog-dolog pakon buntu-buntu, anjaha pameluson-Ku do suan-suananni; salihkonon-Ku do bah mardalan gabe tanoh dorging-dorging anjaha horah bahenon-Ku tao.

¹⁶Togu-toguon-Ku do halak na mapitung bani dalan na so ongga tinandani, bobaan-Ku do sidea bani dalan na so ongga binotohni, paubahon-Ku do hagolapan na ilobei ni sidea gabe haliharon, anjaha dalan na marjuntul-juntul gabe tanoh na rata. Ai ma na sihol bahenon-Ku anjaha seng anjai lupahonon-Ku ai. [392]

¹⁷Maningon surut do hupudi anjaha tarbador sagala na martenger ni uhur bani gana-gana na niuhir, na mangkatahon bani gana-gana na tinuang, “Nasiam do Naibatanami.” [393]

¹⁸Nasiam na nengel, tangar ma, anjaha nasiam na mapitung, mangkawah ma ase marpangidah nasiam! [394]

¹⁹Ise do na pitung anggo lang juakjuak-Ku, atap na nengel songon suruhan-Ku na Husuruh in? Ise do na pitung songon na Huhaporsayai in, atap na pitung songon juakjuak ni Jahowa? [395]

²⁰Tongon, buei do na nididahmu, tapi lang iparimbagaskon ho, buha do pinggolmu, tapi seng ibogei ho. [396]

²¹Iharosuhkon Jahowa do, halani hapintoron-Ni, patimbulhon anjaha pasangapkon titah-Ni.

²²Tapi on do sada bangsa na nirampok ampa na nirampas; ganup do sidea targari ibagas liang, anjaha iponopkon ibagas tutupan; gabe sisorohon do sidea seng dong na paluahkon, gabe sirampason, anjaha seng dong na mangkatahon, “Paulak!”

²³Ise i tongah-tongahnima na manangihon hata ai, anjaha na marimbagaskon anjaha na mardiateihon ai bani panorang na roh?

²⁴Ise do na mambere Jakob bani siparrampas anjaha Israel bani halak panamun? Ai lang Jahowa do, halani mardousa hita hu Bani? Seng ra sidea mardalan bani dalan-Ni, anjaha seng itangihon sidea titah-Ni. [397]

²⁵Halani ai iuseihon do bani sidea gara ni ringis-Ni, ampa jobu ni hamunsuhon; ai ma na mambahen gara sidea inggot, tapi lalab do seng iarusi; tapi seng iparuhurhon ai.