Read Batak Simalungun JESAYA 43 Bible Online

JESAYA 43 - Batak Simalungun bible

JESAYA 43

¹Tapi sonari, sonon do hata ni Jahowa, “Sitompa ho, ale Jakob, anjaha na manjadihon ho, ale Israel, ʻUlang ho mabiar, ai Ahu do sipaluah ho, domma Hudilo goranmu, Ahu do simada ho. [398]

²Anggo ibontas ho bah, Ahu do hasomanmu, bani na mandipari bah banggal seng ayubkonon-Ni ho. Anggo mardalan ho hubagas apuy, seng anjai mosog ho, anjaha seng matutung ho bahenon ni gara ni apuy. [399]

³Ai Ahu do Jahowa Naibatamu, Na Pansing ni Israel, Sipaluah ho. Domma Hubere Masir gabe partobusmu, Kus pakon Seba do panggantihmu. [400]

⁴Halani harga do Huidah anjaha na pinasangap, anjaha holong do uhur-Hu bam, Hubere do jolma panggantihmu, ampa bangsa-bangsa gantih ni hosahmu. [401]

⁵Ulang ho mabiar, ai Ahu do hasomanmu, hun hapoltakan do parohon-Ku ginomparmu, anjaha hun hasundutan patumpuon-Ku ho. [402]

⁶Hatahonon-Ku ma bani utara, “Paulak!” Dompak dangsina, “Ulang jolomi!” Boan anak-Ku humbani na daoh, ampa borung-Ku hun ujung ni tanoh on,

⁷haganup na marpanggoranan bani goran-Ku, na Hutompa bahen hasangapon-Ku, na Hurumang anjaha na Hujadihon. [403]

⁸Boan ma hujon bangsa na pitung, hansi pe dong matani, anjaha na nengel, hansi pe adong pinggolni! [404]

⁹Sagala bangsa parbegu, roh ma marhumpul, anjaha martumpu ma ganup bangsa-bangsa! Ise ma humbani sidea na pabotohkon on, anjaha na pabogeihon na masa hinan hu banta? Ipajongjong ma saksini mamintori sidea, ase itangar halak anjaha ihatahon, “Sintong do!” [405]

¹⁰Hanima do saksing-Ku, nini Jahowa, anjaha juakjuak-Ku na dob Hupilih, ase itanda anjaha ihaporsayai hanima Ahu, anjaha iarusi hanima: Ahu do in. I lobei-Hu seng dong Naibata, i puding-Ku pe seng anjai dong. [406]

¹¹ Ahu, Ahu do Jahowa, anjaha sobali Ahu seng dong Sipaluah. [407]

¹²Ahu do na pabotohkon ampa na paluahkon ampa na pabogeihon ai, anjaha seng dong naibata na legan i tongah-tongahnima; hanima do saksi-Ku, nini Jahowa, Ahu do Naibata. [408]

¹³Ahu do ai humbani na basaia, seng dong na boi paluahkon humbani tangan-Ku; Ahu do mambahen, mintor ise ma na boi manundatisi? [409]

¹⁴Sonon do hata ni Jahowa, “Sipaluah bannima, Na Pansing ni Israel: Halani hanima, Ahu do marsuruh hu Babel, anjaha Huhatahon iparseda pating-pating ni tutupannima, gabe mubah ma olob-olob ni halak Kasdim gabe tangis-tangis.”

¹⁵Ahu do Jahowa Na pansing bannima, Sitompa Israel, Rajanima.

¹⁶Sonon do hata ni Jahowa na mambahen pasar i tongah laut ampa na pauli dalan bani bah marbanggal, [410]

¹⁷na mambahen ase mandarat gareta porang ampa huda, bala ampa siparporang; martibalan do sidea seng tarjongjongkonsi be, miloh do sidea, mintop songon sumbu. [411]

¹⁸Ulang be dingat-dingat hanima na parlobei ondi, anjaha ulang ma pingkir-pingkiri na dob masa.

¹⁹Tonggor ma, Ahu mambahen na baru, domma martumbor nuan, ai lang ididah hanima ai? Ahu mambahen pasar i halimisan, bani tanoh dorging-dorging bah mardalan. [412]

²⁰Pasangapon ni binatang na i talun do Ahu, sorigala ampa burung unta; ai Ahu do na mambere bah i halimisan ampa bah mardalan i tanoh dorging-dorging, laho mambere minum bangsa-Ku na Hupilih in,

²¹bangsa na Hujadihon Bangku ase ibaritahon hamuliaon-Ku. [413]

²²Tapi seng Ahu ipadilo-dilo ho, ale Jakob, anjaha seng ra ho loja marhalani Ahu, ale Israel.

²³Seng iboan ho Bangku biribiri bahen galangan situtungonmu, anjaha seng ipasangap ho Ahu marhitei galangan sisayatonmu. Ai sedo na Huparjabolon ho marhitei galangan sipanganon, atap Hulojai ho marhitei dahupa. [414]

²⁴Seng iboli ho Bangku morum-moruman marhitei pirakmu, anjaha taboh-taboh ni galanganmu seng pabosur Ahu. Tapi domma iparjabolon ho Ahu marhitei dousamu, domma ilojai ho Ahu marhitei hajahatonmu.

²⁵ Ahu, Ahu sandiri pasaloseihon panlanggaronmu halani Ahu, anjaha dousamu seng be padingat-dingaton-Ku. [415]

²⁶Paingat ma Ahu, marsipatorangan ma hita. Pajojor ma, pintori dirimu. [416]

²⁷Ompungmu na parlobei ai mardousa do, anjaha sipangapiti bam marbalik do hun Bangku; [417]

²⁸ipabutak raja-rajamu do rumah-Ku na ma pansing in. Halani ai do ase Huondoskon Jakob bani hasedaon, anjaha Israel bani hahirion.”