Read Batak Simalungun JESAYA 44 Bible Online

JESAYA 44 - Batak Simalungun bible

JESAYA 44

¹Tapi sonari, tangihon ma, ale Jakob, juakjuak-Ku, ampa ho Israel, na dob Hupilih in! [418]

²Sonon do nini Jahowa, na manjadihon ho, na marrumang ho i partapaan ope, anjaha na sihol mangurupi ho: Ulang ho mabiar ale Jakob, juakjuak-Ku ampa ho ale Jesurun na Hupilih in. [419]

³Ai useihonon-Ku do bah bani tanoh na horah, ampa bah mardalan bani tanoh dorging-dorging: Useihonon-Ku do Tonduy-Hu bani dakdanakmu ampa pasu-pasung-Ku bani ginomparmu. [420]

⁴Jadi martumbor ma sidea songon poyon-poyon i lambung ni bah, anjaha songon arung-arung i topi ni bah mardalan.

⁵Hatahonon ni deba halak ma, “Jahowa do simada ahu; na legan marpanggorankon goran ni Jakob, na legan use manuratkon bani tanganni, ʻRupei ni Jahowa, anjaha manggorani dirini marhitei goran Israel.ʼ ”

⁶Sonon do hata ni Jahowa, Raja ni Israel, anjaha na paluahkonsi, Jahowa Zebaot! “Ahu do na parlobei anjaha Ahu do na parpudi; seng dong Naibata sobali Ahu. [421]

⁷Ise ma na songon Ahu? Idilohon ma ai, ipatugah ma, ituri-turihon ma i lobei-Hu. Ise do na patugahkon humbani mungkahni, aha na sihol masa? Ipabotohkon ma banta aha na sihol roh! [422]

⁸Ulang hanima gobir, ulang mabiar! Ai lang domma humbani nahinan Hupabogeihon anjaha Hupabotohkon ai bannima? Anjaha hanima do saksi-Ku. Ai adong do Naibata sobali Ahu? Seng dong batu gingging, seng dong anggo Hubotoh.” [423]

⁹Sipauli gana-gana, na lang do ganup sidea, anjaha na hinarosuhkon ni sidea seng marguna ai; saksi ni sidea seng marpangidah, seng marpambotoh, halani ai bador do sidea. [424]

¹⁰Ai ise do sidea sipauli naibata, situang gana-gana na so marguna ai? [425]

¹¹Tonggor ma, ganup hasomanni ai tarbador do, anjaha tuhangni jolma do; age pe martumpu anjaha marrohan sidea, sai na tarsonggot do sidea anjaha bador. [426]

¹²Tuhang bosi patureihon hapak, marhasoman milas ni apuy; itopa do ai marhitei parpalu, ipadear marhitei gogoh ni tanganni; pala loheian ia gabe seng margogoh, maradu seng minum bah ia gabe galek ia. [427]

¹³Tuhang hayu pagistang bonang arang, mambahen martanda marhitei panurat; ihorjai ma ai marhitei hotam, iuhir anjaha ipolas; ibahen ma ai mangusihi dalahi, songon jolma na jenges, laho marianan ibagas rumah.

¹⁴Adong halak na marroboh hayu ares bani, atap na mambuat hayu maranti atap hoting batu, na pinilihni humbani hayu na i tombak; adong na manuan hayu tusam, ipabanggal-banggal udan ma ai.

¹⁵Marguna do ai bani jolma gabe soban ibuat ma deba hunjai bahen pandadangan, deba pagara apuy laho pamasak ruti; ipauli do homa hunjai naibata, anjaha isombah ma ai; ibahen do hunjai gana-gana anjaha marrogop ia i lobei ni.

¹⁶Satongah hunjai panggarai ni apuy, igoreng do gulei marhitei ai, anjaha na ginoreng ai ipangan gabe bosur; mandadang homa ia anjaha ihatahon ma, “Ah, malas huahap, ibahen apuy on!”

¹⁷Na tading ai gabe naibata ibahen, gabe gana-gana, marrogop ma ia hujai laho marsombah; martonggo do ia hujai, nini, “Paluah ham ma ahu, ai ham do naibata bangku.”

¹⁸Seng dong na binotoh ni sidea, anjaha seng dong na niartihon ni sidea; domma rapit mata ni sidea seng marpangidah, anjaha domma hobal uhur ni sidea, gabe seng marpangartian be.

¹⁹Seng dong na marimbagaskon seng dong habotohon atap pangarusion, gabe ihatahon, “Satongah hututung ibagas apuy, anjaha hupamasak roti i atas narnarni, hugoreng gulei anjaha hupangan; mintor bahenonku ma na tading ai gabe sisombahon? Mintor manrogop ma ahu i lobei ni samponggol hayu?”

²⁰Siramotkon abuan, uhurni do na hona tipu anjaha na kahou ijai; seng tarpaluahsi tonduyni atap tarluarhonsi, “Ai ladung do nani na ibagas tangan siamunkon?”

²¹Paruhurhon ma on ale Jakob ampa ho ale Israel, ai juakjuak-Ku do ho! Ahu do na manjadihon ho, juakjuak-Ku do ho, ale Israel, seng anjai lupahonon-Ku ho. [428]

²² Domma Hupasisi salahmu songon hombun, anjaha songon hombun na manorap dousamu. Mulak ma ho hu Bangku, ai Ahu do na manobus ho. [429]

²³Marolob-olob ma, ale langit, ai Jahowa do sibahen ai! Marsurak ma, ale pusat ni tanoh on! Marmegah-megah ma ale dolog, ampa ho ale tembok, rap pakon sagala hayu na ibagas ai! Ai domma itobus Jahowa Jakob, anjaha marhitei Israel marmulia Ia.” [430]

²⁴Sonon do hata ni Jahowa na manobus ho anjaha na manjadihon ho sanggah i partapaan ope. Ahu do Jahowa, na manjadihon sagala na dong, na paherbang langit marhitei Ahu tumang, anjaha na paamparhon tanoh on marhitei gogoh-Ku sandiri; [431]

²⁵na manlangkon tanda ni parladung, na mambahen oto partondung, na mambahen surut hu pudi halak na pentar, anjaha na mambahen haotoon hapentaran ni sidea; [432]

²⁶na mambahen totap hata ni juakjuak-Ni, anjaha na pasaudkon ranggian na ipatugah suruhan-Ni, na mangkatahon bani Jerusalem, “Ningon ianonkon do; anjaha bani huta-huta ni Juda: Ningon paulion do anjaha reong-reongni pajongjongon-Ku do;

²⁷na mangkatahon bani bah na bagas: Horah ma, anjaha binangani arsikon-Ku do; [433]

²⁸na mangkatahon bani si Kores: Ale parmahan-Ku anjaha sagala sura-surang-Ku pasaudonni do; na mangkatahon bani Jerusalem: Paulion do in; anjaha bani rumah panumbahan: Pajonamon do in.” [434]