Read Batak Simalungun JESAYA 45 Bible Online

JESAYA 45 - Batak Simalungun bible

JESAYA 45

¹Sonon do hata ni Jahowa dompak si Kores na mininakan-Ni ai, na Hujolom ai tanganni siamun laho patundukkon bangsa-bangsa i lobei ni, mananggali sinjata humbani binongei ni raja-raja, laho mambuha labah i lobei ni, ase ulang boi hona tutup horbangan. [435]

²Ahu do mardalan i lobeimu anjaha padosdoskon dolog-dolog; Ahu do na marropuki labah tombaga, anjaha na manrosaki pating-pating bosi.

³Ahu do mamberehon bam arta na ponop, ampa ugas-ugas na buni, ase itanda ho, paboa Ahu do Jahowa Naibata ni Israel, na mandilo ho bani goranmu.

⁴Marhalanihon ni juakjuak-Ku si Jakob pakon Israel na Hupilih in, ase Hudilo ho bani goranmu, anjaha marmulia Hubahen goranmu age pe seng itanda ho Ahu. [436]

⁵Ahu do Jahowa, seng dong na legan, sobali Ahu seng dong Naibata; Hugonditi do ho, age pe seng itanda ho Ahu, [437]

⁶ase ibotoh halak na i hapoltakan pakon na i hasundutan, na so adong Naibata sobali Ahu. Ahu do Jahowa, seng dong na legan,

⁷na manjadihon haliharon anjaha na mangadongkon na golap, na mambahen hadameion ampa na mangadongkon hamagouan. Ahu do Jahowa sibahen haganupan ai. [438]

⁸Manekteki ma, ale langit, hun babou, anjaha hombun iuseihon ma udan hapintoron! Buha ma tanoh on, ase itubuhkon hatuahon, anjaha ibahen ma homa hapintoron martumbor! Ahu do Jahowa na manjadihon ai. [439]

⁹Bursik ma halak na mambahen paringoran dompak na manompasi, sada sanga-sanga dompak sitopa hudon. Mintor hatahonon ni tanoh halampung ma dompak na manopasi, “Aha do na binahenmin? atap hatahonon ni tinopani ai ma, ʻSeng dong tanganmu!ʼ [440]

¹⁰Bursik ma halak na mangkatahon bani bapani, ʻMase ma manubuhkon ho?ʼ atap dompak inangni, ʻMase ma mangarou ho?ʼ

¹¹Sonon do hata ni Jahowa, ʻNa Pansing ni Israel anjaha na manompasi: Sihol sungkunonnima Ahu pasal anak-Ku anjaha aturonnima Ahu pasal jadi-jadian ni tangan-Ku?ʼ

¹²Ahu do na manjadihon tanoh on, anjaha jolma na i atas ni, Ahu do manompa; Ahu, tangan-Ku sandiri do na paherbang langit, anjaha Ahu do na mamarentah ganup balani.

¹³Ahu do pabangkitkonsi marhitei hapintoron anjaha Ahu pahornop dalan bani; ia do na paulihon hutang-Ku anjaha paluahonni do bangsang-Ku na tarbuang in; seng halani upah atap halani sisip; nini Jahowa Zebaot.” [441]

¹⁴Sonon do hata in Jahowa, “Habayakon ni halak Masir, boniaga ni halak Etiopia pakon halak Seba, pardaging na ganjang ai, maningon bam do ai mandipar anjaha ho simada ai: irikkonon ni sidea do ho, roh do sidea ibagas gari marrogop i lobeimu, bam do sidea mangelek-elek: Pitah bamu do dong Naibata, anjaha seng dong na legan, sobali Ia seng dong Naibata.” [442]

¹⁵Tongon, Ham do Naibata na ponop marhadirion, ale Naibata ni Israel, Sipaluah in. [443]

¹⁶Maila anjaha tarbador do sidea haganup; madorun do sidea haganup halak sipauli gana-gana. [444]

¹⁷Tapi Israel, maluah do marhitei Jahowa, maluah tongon ronsi sadokah ni dokahni, seng anjai maila anjaha seng anjai bador hanima sadokah ni dokahni.

¹⁸Ai sonon do nini Jahowa, “Sitompa langit in, ai ma Naibata na manompa tanoh on ampa na manjadihonsi, ai ma na pajonamkonsi, sedo ase tarulang ase itompa, bahen ianan do ase ijadihon ai; Ahu do Jahowa, seng dong na legan. [445]

¹⁹Seng bani na ponop marsahap Ahu atap bani ianan na golap i tanoh on; seng dong Huhatahon bani ginompar ni si Jakob: Soya-soya do na pinindahannima in Ahu! Ahu do Jahowa, na mangkatahon hapintoron, na patugahkon hasintongon. [446]

²⁰Martumpu ma, anjaha roh ma hanima hu Bangku, padohor hanima ma ganup, ale na pinaluah humbani bangsa-bangsa! Seng marpangarusion sidea ai, na mangusung gana-gana hayu ni sidea, ampa na manumbah bani naibata na so boi paluahkon. [447]

²¹Baritahon ma, pajojor ma; manriah ma hanima samah hanima. Ise do na pabogeihon on humbani na hinan, na pabotohkon humbani sapari? Ai lang Ahu do Jahowa? Seng dong Naibata sobali Ahu, Naibata na pintor anjaha na boi paluahkon, seng dong sobali Ahu. [448]

²²Dompakkon hanima ma Ahu ase ipaluah hanima, ale ujung ni tanoh on. Ai Ahu do Naibata, seng dong na legan be.

²³Domma marbija Ahu bani diring-Ku, hapintoron do luar humbani pamangan-Ku, hata na so boi mulak: Maningon manowod do sagala towod Bangku, marbija sagala dilah, [449]

²⁴ nini, ʻPitah ibagas Jahowa do adong hapintoron ampa hagogohon bangku.ʼ Haganup na mangimbangsi maningon roh do hubani gabe tarbador. [450]

²⁵Ibagas Jahowa dapotan hapintoron anjaha mamuji-muji do ganup ginompar ni Israel.”