Read Batak Simalungun JESAYA 47 Bible Online

JESAYA 47 - Batak Simalungun bible

JESAYA 47

¹Turun anjaha hundul ma bani orbuk, ho anak boru Babel! Hundulhon bani tanoh, seng marparatas, ho boru Kasdim! Seng be goranon ho naboru na lamlam anjaha na jenges. [458]

²Alop losung, duda nitak! Padaoh tudung-tudungmu, anjaha tanggali baju ganjangmu; marbasahan ho, dipari ma binanga ai!

³Talar ma hatalanjangonmu anjaha taridah hailaonmu; sihol do Ahu marlulu, jolma pe lang Hulioi, [459]

⁴nini, “Sipaluah hita, ai ma Jahowa Zebaot, Na Pansing ni Israel.”

⁵Sip ho hundul, anjaha laho ma hubani na golap, ale boru Kasdim! Ai seng be goranon ho, boru jujungan ni harajaon-harajaon.

⁶Manggila do Ahu bani bangsang-Ku, Hupaturut do butak parbagianan-Ku; Huondoskon do sidea hubagas tanganmu, tapi seng marholong ni atei ho bani sidea; bani na matua pe itampeihon ho do pasanganmu na borat ai. [460]

⁷Nim, “Sadokah ni dokahni do ahu dong, boru jujungon do ahu lalap!” Seng iparuhurhon ho ai atap ipingkiri ho, sonaha ujung ni ai. [461]

⁸Halani ai tangihon ma on, ale siparmegah-megah, ho na hundul marsonang-sonang, na mangkatahon ibagas uhurmu, “Ahu ma da in, seng dong sobali ahu!” Seng anjai mabalu ahu, seng anjai popor ahu! [462]

⁹Na dua on maningon mangonai bam, sompong ibagas na sadari: Hapoporon ampa habaluon maningon roh do bam ibagas parsuhatan na gok, age pe buei uti-utiannima anjaha marhagogohon tabas-tabasmu.

¹⁰Ipangajamkon ho do hajahatonmu, nim, “Seng dong na mangidah ahu!” Hapentaranmu ampa habotohonmu do na pakahouhon ho, gabe ihatahon ho ibagas uhurmu, “Ahu ma da in, seng dong sobali ahu!” [463]

¹¹Tapi roh ma bam hamagouan, na so boi tulakonmu, mangonai ma bam hasedaon, na so tarlembangi ho; sompong do ho malonglong, na so niagak ni uhurmu.

¹²Nunut ma tongon uti-utianmin ampa hinabuei ni tabasmin, na hinalojahonmin humbani sietek-etekonmu nari, ra tolap do ho mangurupi, ra tarpambiar-biari ho do. [464]

¹³Loja ni in ho ibahen buei ni sipodahi ho, jongjong ma tongon sidea mangurupi ho, sisibari langit ai, na mardiateihon bintang-bintang ai, na pabotohkon aha na sihol roh bam, bani ganup poltak ni bulan.

¹⁴Tonggor ma, songon tompoh-tompoh do sidea siboiskonon ni apuy; seng tarpaluah sidea dirini humbani gara ni apuy. Ai apuy ai sedo bahen pandadangan ai, sedo apuy tataring ai, na boi sidohoran.

¹⁵Sonon do masa bam humbani halak na hinopkopmu, humbani hasomanmu martiga-tiga humbani sietek-etekonmu nari: Ganup sidea lintun marsitohu dalanni; seng dong na paluahkon ho.