Read Batak Simalungun JESAYA 49 Bible Online

JESAYA 49 - Batak Simalungun bible

JESAYA 49

¹Tangar hanima ma ahu, ale sagala pulou, anjaha bogei ma, ale bangsa-bangsa bani na madaoh! Jahowa do na mandilo ahu humbani partapaan ope, itarsingati do goranku humbani boltok ni inang ope.

²Ibahen do pamanganku songon podang na marot, bani linggom ni tangan-Ni do iponopkon ahu; ibahen do ahu gabe panah na pinapinsur, anjaha ibagas parlingkitan-Ni do ahu ibunihon. [480]

³Ihatahon do hu bangku, “Juakjuak-Ku do ho, ale Israel, parhiteian ase marmulia Ahu.” [481]

⁴Tapi anggo ahu, ningku do, “Soya-soya do ahu na loja in, bani na lang ampa bani na so marguna do huparbois-bois gogohku, tapi Jahowa do na pasintongkon uhum bangku anjaha upahku marguru bani Naibatangku.” [482]

⁵Tapi sonari ihatahon Jahowa, na manjadihon ahu gabe juakjuak-Ni humbani partapaan ope, laho paulakkon Jakob hu Bani, anjaha mambahen Israel martumpu hu Bani, ai marmulia do ahu bani pangidah ni Jahowa, anjaha Naibatangku do gabe hagogohon bangku,

⁶nini do, “Maotiktu do ai ho gabe juakjuak Bangku, pitah pajongjong marga ni Jakob ampa paulakkon simasima ni Israel; tapi Hubahen do ho homa gabe panondang bani bangsa sipajuh begu-begu, anjaha ho do parhiteian ni haluahon das huujung ni tanoh on.” [483]

⁷Sonon do hata ni Jahowa, Sipaluah Israel, Na Pansing in, dompak halak na niapasan, dompak na hinagigihon ni bangsa-bangsa, dompak na pinarjabolon ni parrajai, “Idahon ni raja-raja ma ai gabe jongjong bei ma laho mangkormati, anjaha na sangap-sangap marrogop laho marsombah, halani Jahowa, hatengeran ai, ampa Na Pansing ni Israel, na dob mamilih ho.”

⁸Sonon do hata ni Jahowa, “Bani panorang paridop ni uhuran do ho Hubalosi, anjaha bani ari haluahon do ho Huurupi, Huramotkon do ho anjaha Hupabangkit do ho gabe padan bani bangsa in, laho patorsahon tanoh in, laho mambagihon tanoh na dob tarulang in, [484]

⁹laho mangkatahon bani halak na tartutup, ʻLuar ma!ʼ dompak na ibagas hagolapan, ʻRoh ma bani haliharon!ʼ Dapotan gagaton do sidea i topi dalan, anjaha buntu-buntu na leseng do sampalan bani sidea. [485]

¹⁰Seng loheian sidea anjaha seng horahan, seng mangonai bani sidea logou na milas atap mata ni ari pe, ai Parholong bani sidea ai do na mambobai sidea anjaha itogu-togu do sidea i lambung ni bah tubuh. [486]

¹¹Bahenon-Ku do sagala dolog gabe dalan anjaha dalan na bolon pagijangon do. [487]

¹²Tonggor ma, on roh humbani na daoh, on roh hun utara ampa hun pastima, on roh hun Sinim. [488]

¹³Marsurak-surak ma ale langit anjaha marolob-olob ma ale langit anjaha marolob-olob ma ale tanoh on! Marmegah-megah ma ale dolog! Ai iapoh Jahowa do bangsa-Ni anjaha maidop do uhur-Ni bani bangsa-Ni na madoyuk. [489]

¹⁴Tapi nini Sion, ʻDomma itadingkon Jahowa ahu, domma lupa Tuhan bangku.ʼ

¹⁵ Mintor tarhalupahon puang-puang ma anakni na inuman, mintor lang ma holong uhurni bani anak tinubuhkonni? Porini pe tarhalupahonsi sidea, anggo Ahu seng tarhalupahon Ahu ho. [490]

¹⁶ Tonggor ma, domma Huuhirhon ho bani tapak tangan-Ku; tembokmu tongtong do i lobei-Hu.

¹⁷Mangolos do roh na paulihon ho, tapi halak siparseda ampa siparreong ho maporus do humbam.

¹⁸Mangkawah ma ho inggot anjaha tonggor ma, ʻGanup do sidea martumpu, roh do sidea bam.ʼ Songon sintongni manggoluh Ahu, nini Jahowa, maningon sorungkononmu do sidea songon panjagar, maningon gonditkononmu do sidea songon pambahen ni tunangan. [491]

¹⁹Tongon, tanohmu na dob maseda, na dob tarulang anjaha na dob mareong, masompittu do ai bani na mangiankonsi, anjaha mandaoh ma na sihol mangagou ho.

²⁰Homa hatahonon ni anakmu do bani pinggolmu ale boru na lambang: Masompittu do ianan on bangku, palumbang ma bangku ase boi huiankon. [492]

²¹Jadi hatahononmu ma ibagas uhurmu, ʻIse na manubuhkon on bangku?ʼ Ai lambang do ahu anjaha lungunan, tarbuang anjaha iambuk-ambukkon. Ise do na pagodang-godangkon on bangku? Tonggor ma, punjung do ahu, hunja do sidea on roh?

²²Sonon do hata ni Tuhan Jahowa, ʻTonggor ma, hilapkonon-Ku do tangan-Ku bani bangsa sipajuh begu-begu, anjaha pajongjongon-Ku do mandera partanda bani bangsa-bangsa, jadi boanonni ma anakmu ibagas abinganni, ampa borumu bani abara ni sidea.ʼ [493]

²³Raja-raja do gabe parorot bam, anjaha raja naboru inang na pagodang-godangkon. Marrogop do sidea das hu tanoh marsombah bam, anjaha idilat orbuk ni naheimu. Maningon botohonmu do, Ahu do Jahowa; seng bador sagala na martenger ni uhur Bangku. [494]

²⁴Ai tarbuat do humbani na gogoh taban-taban, atap tarpaluah do halak tahanan humbani sipangodoh-odoh? [495]

²⁵Tongon, sonon do hata ni Jahowa, ʻBuaton ma halak tahanan humbani halak na gogoh, anjaha paluahon taban-taban ni halak sipangodoh-odoh, ai Ahu do mangimbang siimbang ho, anjaha Ahu do na paluahkon anakmu.ʼ [496]

²⁶Anjaha bahenon-Ku do halak na mangarsik ho mangankon dagingni sandiri, anjaha mabuk do sidea bani darohni sandiri songon na minum anggur. Jadi botohon ni sagala daging ma, Ahu do Jahowa, Sipaluah ho anjaha Sitobus ho, na gogoh bani Jakob.” [497]