Read Batak Simalungun JESAYA 50 Bible Online

JESAYA 50 - Batak Simalungun bible

JESAYA 50

¹Sonon do hata ni Jahowa, “Ija do surat sirang bani inangnima, tandani na dob Hupaulak ia? Atap ise do parutangan-Ku, panjualan-Ku bannima? Tonggor ma, halani hajahatonmu do ho tarjual, anjaha halani panlanggaronnima do ase isirangkon inangnima. [498]

²Mase ma, sanggah roh Ahu, ise pe lang na ijin? Dilo-dilo Ahu, ise pe lang na marbalos? Ai mapondoktu do nani tangan-Ku laho paluahkon, atap na so margogoh do Ahu pabansahkon? Tonggor ma, marhitei ondam-ondam-Ku horah do Hubahen laut, Hubahen do bah mardalan gabe halimisan; marbau do bangkei ni sidea halani seng dong bah, anjaha marmateian halani horahan. [499]

³Marhiou sibirong do Hubahen langit anjaha guni Hubahen sabingni.” [500]

⁴ Domma ibere Tuhan Jahowa Ahu mardilah susian, ase hubotoh marhitei hata ai manungkoli halak na loja. Ipuhoi do ahu ganup sogod, ibahen do pinggolhu torang marpanangar songon susian. [501]

⁵Tuhan Jahowa do na mambuha pinggolhu, seng manlawan ahu, anjaha seng surut ahu hu pudi. [502]

⁶ Huberehon do gurungku bani halak sibogbog ahu, sonai age huyumku bani halak na marrintak gumisku; seng huponopkon bohingku dompak hahirion ampa tijur. [503]

⁷Tapi Tuhan Jahowa do na mangurupi ahu, halani ai seng bador ahu; hubahen do bohingku songon batu bosi, ai hubotoh seng anjai ipaturut ahu bador. [504]

⁸Dohor do sipintori ahu. Ise sihol marimbang pakon ahu? Jongjong bei ma hita. Ise lawanku bani parkara on? Ipadohor ma hu bangku. [505]

⁹Tonggor ma, Tuhan Jahowa do na mangurupi ahu, ise do na mansalahkon ahu? Tonggor ma, buruk do sidea songon hiou, ngitngit do mangankon sidea.

¹⁰Ise humbennima na mabiar mangidah Jahowa, itangihon ma hata ni juakjuak-Ni; ise na mardalan bani na golap, anjaha seng dong haliharon bani, ihatengerhon ma goran ni Jahowa, anjaha marpangajaman ma ia bani Naibatani.

¹¹Tonggor ma, hanima haganup sipagara apuy, ampa sitembakkon panah na pinagara, laho ma hanima hubagas gogoh ni apuynima sandiri ampa hubagas apuy pinagara ni lingkitnima. Tanganku do na pamasa ai bannima, maningon tibal-tibal do hanima marhamarsikon. [506]