Read Batak Simalungun JESAYA 51 Bible Online

JESAYA 51 - Batak Simalungun bible

JESAYA 51

¹Tangihon hanima ma Ahu, ale sipindahi hapintoron, hanima na mandarami Jahowa! Kawahkon hanima ma dolog batu pambuatannima, ampa parigi pangkurakan bannima! [507]

²Kawahkon ma si Abraham ompungnima ampa si Sara na manubuhkon hanima; sahalaksi do sanggah Hudilo ia, jadi Hupasu-pasu anjaha Hupabuei ma ia. [508]

³Tongon, apohon ni Jahowa do Sion, apohon-Ni do ianan na tarulang ai; bahenon-Ni do halimisan songon pohon Eden, anjaha tanohni dorging-dorging songon pohon ni Jahowa. Malas ni uhur ampa hamegahon do jumpah ijai, puji-pujian ampa sora ni na mandoding-doding. [509]

⁴Tangihon hanima ma Ahu, ale bangsang-Ku, anjaha hanima bangsa-bangsa, pateleng hanima ma pinggolnima Bangku! Ai hun Bangku do harohan ni titah, anjaha Ahu do pajongjong hasintongan-Ku gabe haliharon bani bangsa-bangsa.

⁵Domma dohor hapintoron-Ku, domma bingkat haluahon na hun Bangku; tangan-Ku do na manguhum bangsa-bangsa; Bangku do martenger ni uhur sagala pulou, anjaha bani tangan-Ku do sidea marpangarapan. [510]

⁶Tarei hanima ma dompak langit, anjaha kawahkon hanima ma tanoh on hu toruh! Laho salpu do langit songon timus, anjaha tanoh on pe buruk do songon hiou, anjaha isini marmateian songon rongit. Tapi haluahon na hun Bangku totap do sadokah ni dokahni anjaha hapintoron-Ku seng anjai maronti. [511]

⁷Tangihon hanima ma Ahu, ale sitandai hapintoron, ho bangsa na marimbagaskon titah-Ku ibagas uhurni! Ulang ma habiari hanima parpahiri ni jolma, anjaha ulang ma tarsonggot hanima bani panrisaion ni sidea! [512]

⁸Tongon, songon hiou do sidea bois panganon ni ngitngit, anjaha songon hiou wol gagaton ni gilok-gilok; tapi hapintoron-Ku totap do ronsi sadokah ni dokahni, anjaha haluahon na hun Bangku marsundut-sundut do. [513]

⁹Puho Ham, puho ma Ham, sorungkon ma hagogohon. Ham tangan ni Jahowa! Puho ma Ham songon bani panorang na basaia, songon bani sundut na parlobei! Ai lang Ham do na manoktoki si Rahab ampa na mamantom naga ai? [514]

¹⁰Ai lang Ham do na pahorahkon laut ai, bah ni luhung na bagas ai, na mambahen laut na bagas gabe dalan, bahen pandiparan ni na tinobusmu? [515]

¹¹Anjaha na tinobus ni Jahowa mulak ma, roh hu Sion marhasoman olob-olob, malas ni uhur sisadokah ni dokahni do i atas ulu ni sidea. Malas ni uhur ampa hamegahon do jaloon ni sidea, tapi maporus do pusok ni uhur ampa hoih-hoih. [516]

¹²Ahu, Ahu do ai na mangapohi hanima! Ise do ho, ase mabiar ho bani jolma na laho matei in atap bani anak ni jolma, na laho salpu in songon poyon-poyon, [517]

¹³gabe lupa ho bani Jahowa, na manompa ho, na paherbang langit ampa na pajonamkon tanoh on, gabe tongtong ho mabiar ganup ari, mangidah gila ni sipangodoh-odoh, na marsura-sura laho mangagouhon? Ija do nuan gila ni sipangodoh-odoh ai? [518]

¹⁴Podas do maluah halak na tarbayang, seng anjai matei ia; masuk hu tanoman, seng anjai hurangan sipanganon ia.

¹⁵Ahu do Jahowa Naibatamu, na manggunsang laut gabe marhasak gilumbangni; Jahowa Zebaot do goran-Ku. [519]

¹⁶Ahu do na mannahkon hatang-Ku bani pamanganmu, anjaha na mangondingi ho bani linggom ni tangan-Ku, sanggah na Hupaherbang use langit anjaha Hupajonam tanoh on, anjaha Huhatahon bani Sion, “Bangsang-Ku do ho.” [520]

¹⁷Hehe ma, hehe ma, jongjong ma ale Jerusalem, ho na dob minum humbani tangan ni Jahowa, humbani panginuman ni gila-Ni, na dob manginum, ronsi mandilati panginuman parmabukon. [521]

¹⁸Seng dong na manogusi humbani anak na tinubuhkonni, seng dong na manjolom tanganni humbani anak na pinagodang-godangni.

¹⁹Na dua pahara on do mangonai bam, ise ma dong na horu pasal ho? Hasedaon ampa hasosakan, lohei ampa podang, ise ma na mangapoh ho? [522]

²⁰Mandatei do anakmu, martibalan bani ganup topi ni pasar, songon ursa na hona siding; gok do gila ni Jahowa mangonai bani sidea, asup-asup ni Naibatamu. [523]

²¹Halani ai tangihon ma on, ale na madoyuk, ampa na mabuk, tapi sedo binahen ni anggur.

²²Sonon do hata ni Tuhanmu, ai ma Jahowa, Naibatamu na marporang mangkopkop bangsamu, “Tonggor ma, buaton-Ku ma humbani tanganmu panginuman hamabukon ai, ai ma panginuman na gok bani ringis-Hu, seng be inumonmu ai.” [524]

²³Berehonon-Ku ma ai hubagas tangan ni na mangarsik ho, na mangkatahon bam, “Paunduk, ase mandipar hanami!” gabe ibahen ho do gurungmu rata songon tanoh, anjaha songon dalan bani halak sipamontas. [525]